何君诚移居蒙古转行做旅馆老板　唔担心会失败：我冇咩输！

凭处境剧《爱‧回家（第二辑）》上位的前TVB小生何君诚自去年约满TVB后，决定离巢，寻找人生方向。最近，他就决定移居蒙古投资过百万开牧场以及旅馆，并会前往哈尔滨买马，一圆马主梦！

现年35岁的何君诚在2008年参选香港先生，虽然12强止步，但仍被看好加入TVB成为合约艺员，不过大都被派演闲角，直至2015年拍摄处境《爱‧回家（第二辑）》饰演方嘉尚（Billy）而为人熟悉。但由于近年产量每况愈下，而令何君诚决心离巢，他接受《香港01》访问时称：“其实你同TVB讲钱系一个笑话，咁唔讲钱仲可以讲咩？冇错，就系讲机会，但当你连机会都见唔到嘅时候，唯有离开，因为青春系你自己嘅！（人工真系咁低？）我一个月人工都有2万几，但冇机会，逗得几多年？”

离开TVB后，何君诚亦直言未找到人生方向，直至7月去蒙古旅行而令他萌生移居当地投资牧场以及旅馆生意，他指：“其实我一直都好钟意马，所以先会想去蒙古嘅大草原睇吓。去到当地，我就发现原来𠮶边好流行用Camping Car（露营车）旅行，但𠮶边又少旅馆可以提供叉电等等嘅配套，仲系好唔完善，所以我就觉得有得做，开始计划点样喺𠮶边可以开一个牧场，吸引啲旅客过嚟旅馆玩。”

虽然何君诚坦言自己没有做生意的经验，但就好有信心经营这盘生意，更豪言有信心开业前能够回本：“因为𠮶边5至9月先系旅游旺季，而其他时间都系冰封，唔适合旅行，但我好有信心会喺开业前回本，依家我每个月都会去视察环境、准备申请牌照、买马同埋同旅行社倾紧合作。如无意外，今年5月就会动工，6月开始接生意。（开业前回本？点做到？）其实我已经揾到投资者投资，又构思紧同广告商合作。而且我又会推出例如牛奶嘅产品，所以都有信心做到。（呢盘生意要投资几多？）我目标系一百万，因为呢个数已经够我一年嘅建设加营运。（呢一百万系你积蓄？）系投资者嘅钱，其实依家只要你有桥，喺内地揾投资者其实唔难！”

何君诚又指不担心自己会失败：“其实蒙古租块地每年都系几万，而且𠮶边唔可以破坏草原，建设都系蒙古包或者货柜，所有成本唔高，冇咩输！”何君诚更讲笑希望自己能够娶个蒙古老婆。