被指“造奖论”暗嘲菊梓乔未够班　吴若希︰如有得罪纯属你小器

TVB《劲歌金曲颁奖礼2018》已经圆满落幕，所有奖项都已经尘埃落定，但是非就仲未有停嘅迹象。当晚菊梓乔（Hana）首夺“最受欢迎女歌星”，更系继容祖儿后第二位80后夺得呢个奖项。不过当晚坐喺Hana隔离嘅同门师姐吴若希，反而成为网友焦点，由宣布得奖疯狂大笑13秒，到颁奖礼后访问中讲嘅“造奖论”都被放大讨论，呢日佢本人就亲自回应啦。

劲歌当晚星梦歌手几乎人人有奖，Hana更成为大赢家。同门师姐吴若希一直被指同Hana不和，争公司一姐之位。颁奖礼后吴若希被问到菊梓乔夺得大奖有咩睇法，讲咗句：“造俾佢都应该，系自己公司人。”被外界解读为不屑造马赛果。呢日吴若希就喺Facebook留言话：“所有嘢，我都系特登谂过先讲既，亦都唔觉得得罪人。如有得罪，纯属你小器﹗我会继续讲我觉得应该讲既嘢，多谢！”到底佢话边位小气呢？睇嚟下次现身做访问又要解画啦。