古巨基胡定欣《爱与诚》MV后　相隔14年后再续情缘　

撰文： 洪晓璇
出版：更新：

古巨基4月将会再登红馆举行演唱会，呢排动作多多开始宣传活动，除咗揾嚟老友古天乐视像通话卖下广告之外，呢日亦提出新歌《乱世情侣》MV，而女主角就揾来视后胡定欣。想当年定欣正正系基仔经典金曲《爱与诚》嘅MV女主角，相隔14年再合作又有咩新体验？

14年前基仔同定欣拍摄《爱与诚》MV。（网上图片）
14年后再度合作，两个人好似食咗防腐剂一样，外貌真系无咩改变。

讲起往事，佢哋两个都互笠高帽，大赞对方完全冇变过，基仔同胡定欣讲：“好特别呀个感觉，我哋头先倾偈，都话眨吓眼就过咗咁多年。佢拍剧时间好忙，好耐冇做MV女主角，所以我喺度要特别多谢佢。”除咗唱同演，今次MV亦由基仔亲自执导，定欣话：“基仔解说MV故事时解释得好详尽，今朝喺车上面听佢讲时，我已经好有画面、好感动。”基仔亦不忘大赞胡定欣演技一流，“定欣当年帮我拍完《爱与诚》后，一直努力拍剧甚至两夺视后，绝对系好戏之人！有好多场戏定欣都系一take过，而且有几个位我都睇到眼红红。”

今次拍摄MV，系胡定欣“出山”之作，“我旧年五月做完舞台剧之后，就冇做过戏啦！所以今日系我第一日返工哈哈。都觉得系时候pick up番。”

MV讲述一对情侣大家为咗储钱计划结婚，各自忙碌工作令感情生活麻烦，女方返office经常OT、男方就系仓务员返通宵班，睇落好似一齐计划将来，但系其实忘记咗身边嘅人。最后有所领悟的基仔跑去胡定欣公司揾佢，一个touching嘅结局。基仔话：“为咗计划将来，但忘记咗而家，忘记咗两个走埋一齐嘅最初意义，所以呢只歌加埋呢个故事，系一个爱情上几大嘅感触嘅故仔。”胡定欣亦有感而发，“唔单止系返office工有咁嘅情况，其实我哋做呢行都系，冇日冇夜，好多好重要嘅moments或者好似首歌讲嘅人与人之间最紧要𠮶样感情、过程中紧扣嘅感觉缺乏咗。”

喺office拍摄仲勾起咗胡定欣入行前嘅回忆，“我做过两年秘书先至入行，同埋觉得返office呢件事好贴地呀，哈哈。”