【后生仔倾吓偈】麦明诗重提旧爱即眼湿湿：谂起都唔开心

冯盈盈同麦明诗近年因一齐主持节目《后生仔倾吓偈》而成为好友，前者不时喺节目讲甜嘢，而后者就主力谈情，最新一集以“香港人好钟意返工？”为题作为讨论，讲到咩情况最唔应该返工时，6号同FYY都一致认为系“失恋”，虽然麦明诗认为系“情人节”，但对两位拍档嘅意见都深表认同。“做艺人呢样先系最惨，失恋仲要返去拍剧，你又唔会同人讲，你又唔想比人见到唔开心，唯有死撑，系好唔开心，但又要做啲好hyper嘅嘢，啲人叫我完全系无反应。”

麦明诗之后更不自觉回带，提到与前度大吵一场之后，继续开工。“当晚我系为港姐彩排，我御任。我记得系趁唔使彩排时，去咗停车场讲电话，当时仲有一班港男见到，佢哋知我唔想被人发现喊，所以全部都扮见唔到。”麦明诗指当时已被记者用长镜拍下喊样，并待她工作结束后，跟踪她到前度寓所。“我谂住去佢屋企留下倾，一落车就有人拎住相机系咁影……我谂起都唔开心。”虽然整个对话内容都未有开名，但麦明诗口中嘅“佢”咪就系林作啰。

麦明诗全程都系笑住咁“回带”，但就愈讲愈出事，FYY见势色唔对，亦加以安慰，表示“会有新仔”，当听到听到6号“反正你之后都新咗几次”时，麦明诗笑中带泪咁话“咁又系，依家直情好开心。”十分感触。见到麦明诗喊咁口，FYY都忍唔住话“佢话好多仔𠮶下真系好唏嘘……”分手两年多，麦明诗提起林作时如此伤感，到底系被情伤得太深，定未忘情呢？