严崇天入行十年终圆出书梦　哽咽感谢邓健泓及Aka仗义力撑

一人有一个梦想，或者香港唔系一个可以完全放手追梦嘅地方，但圆梦其实都系有心唔怕迟。前有线娱乐主播严崇天入行超过十年，主持方面备受肯定，但其实佢一直无忘记出书梦，终于推出首部小说作品，呢日举行新书签名发布会，大批艺人好友，包括邓健泓夫妇、Super Girls成员Aka、吴日言、黄芷晴、邵音音等亲身撑场，令阿天相当感动一度哽咽。

阿天表示小说其实十年前已经构思及写咗开头，但拖到半年前先的起心肝完成作品。佢喺台上亦有一一鸣谢好友支持，原来冯宝宝同邵音音两位前辈，已经分别预购20及50本小说﹗邓健泓亲自为佢写序，阿天语带哽咽话：“之前曾经有段时间非常低落唔太想见人，Patrick知道后就同我讲，屋企有煮饭呀，过嚟一齐食啦，亦不时揾倾计开解我，𠮶阵真系觉得好温暖。”

小说封面由相识廿载嘅Aka亲手绘画，佢话同阿天系最好嘅朋友，失意时多得对方支持：“四、五年前患上玫瑰疹，我打电话畀阿天诉苦，佢仲发紧烧都即刻飞的士嚟陪我倾足成晚。”阿天笑指真系唔少朋友想将佢同Aka凑作一对：“不过佢太港女啦哈哈讲笑啫，其实系同佢实在太熟好似家人，如果拍拖会有乱伦感觉，所以都系唔好啦﹗”