【志云拆局．专访】议题立场无对错 陈志云：最紧要面对自己
奇妙电视77台改名“开电视”之后推出一系列节目，当中包括由陈志云主持的《志云拆局》。志云邀请正反各方人士，多角度探讨城中最热最具争议性的话题，希望在讨论的过程中，为大家找到共识。而关于这档节目，志云本人都感触颇深，看他如何解读。
Q：香港01
陈：陈志云
喜：王喜
《志云拆局》议题众多 由大麻合法化讲到性工作权利
Q：点解今次会有呢个节目嘅出现？
陈：系想大家一齐去谂啲嘢，去刺激观众有啲想法，其实里面讲嘅议题，全部系冇对同错嘅，喺唔同时空，唔同社会，唔同年代，可以有唔同嘅立场。大家觉得难啃嘅，就真系可能大家要赤裸裸去面对一啲我哋应该去谂嘅嘢，同埋去面对自己点解要有呢个立场，但讲嘅都系好贴身嘅，喺呢个社会发生紧嘅嘢，譬如话“大麻应唔应该合法化？”讲咗好耐，但而家越来越逼近埋身，加拿大啱啱先休闲用大麻合法化，英国药用合法化，咁香港又点样呢？点解用药又一定唔得呢？我哋要谂。好似性工作咁，好多年（前）已经有，但性工作者系冇享受性工作嘅权利，我哋法律里边，系冇话如果你一个人出嚟以性工作去谋生，你唔系犯法，但如果你经营一个生意就系犯法，同埋有好多法例去打击你做呢样嘢嘅，连一个性工作者戴避孕套都可以成为佐证，佢系做性工作嘅，有好多其他嘅法例去围住呢样嘢。
自感“明日大屿，高球甩难”无意义：我哋冇得面对自己
Q：每一集其实都唔系咁易消化，点解最初想做咁样一个节目呢？
陈：我知道特别难啃𠮶集叫“明日大屿，高球甩难”，我系好唔想做。因为初初团队话做高尔夫球场系咪应该要取代佢嘅时候，我觉得讲嚟做乜嘢啫？政府已经倾向唔郁佢，当然政府而家未讲喇，佢都有解释，（喜：大屿山填海出嚟，梗系唔郁佢。）呢个系后来我去点睛，即系我话如果你就咁讲高球甩难，我觉得冇得讲，除非你加埋个名系大屿嚟讲，就update小小，我觉得好冇意义𠮶集去讨论，呢个我哋有得唔做咩？已经系一个定案。就我节目嚟讲，𠮶集我唔觉得系一个好好嘅议题，但其他𠮶啲我都觉得真系可以拎你里面啲嘢出嚟去面对自己，“明日大屿”我哋冇得面对自己。
《志云拆局》当中有一集请来电影《十年》导演欧文杰同香港影业协会理事长洪祖星，两人大谈港产片的存亡，当中洪祖星更大爆“有版权持有人，自己做盗版”，Stephen对那集也印象深刻。
Q：欧文杰𠮶集对你嚟讲都几爆？
陈：其实系㗎，我𠮶集做得好开心，不过有啲可惜，因为洪生（洪祖星）讲得激动，就甩咗啲假牙，佢嘅爱国情冲咗出嚟，但系cameraman冇影到。就好似我哋讲鬼𠮶集，冇人揿门钟但门钟响，打开门冇人嘅，但系最刺激𠮶度又冇影到。
喜：就系喺我面前摆咗3个袋，里面传来电话铃声，但系𠮶3个袋打开之后系冇电话。
陈：同埋大家手提电话系熄晒㗎，系冇电话，个场系教会。
（洪祖星话做电影捞埋翻版𠮶个都真系几爆嘅。）
陈：𠮶个因为系我嘅迷思，唔系喺个稿里边嘅，但其实我哋香港电影仲有冇前途？系咪真系唔睇内地市场就冇得做？我觉得都关我哋事，如果香港真系冇咗本土电影，冇咗自己讲自己故事嘅时候，系一件事嚟嘅，我哋呢扎喺回忆𠮶度嚟，我而家净系睇返，就最钟意睇荔园有人着游泳衣，因为𠮶阵时有泳棚，呢啲系集体回忆。
制作时间紧迫 由签约到开录仅一个月
Q：当初系阿喜Suggest你去做呢个节目，亦或系自己想做？
陈：梗系我谂㗎啦，佢边有咁嘅智慧！
喜：咪系啰……原本呢个节目应该喺我哋个场度拍嘅，本来筹备系类似一个《Late-night Talk Show》咁样，有现场观众，但系一路剧情发展落嚟之后，有好多现实嘅问题系做唔到，我哋都控制唔到。（唔够钱？）都唔系，外判或者自己in house系差唔多嘅，外判仲平小小。咁但系系我哋自己嘅问题，因为我哋赶住去Rebranding，治理好多嘢，跟住去到好赶，我记得第一集录影系9月。但系真系落实，变成而家呢个Format，喺8月先签约，然后9月5号就已经开始录第一集，咁你谂下几赶。
部分议题争议性大 阿喜Stephen叹场地难租借
Q：咁其实有冇谂过，再之后继续做落去，即系譬如好似直头将Jimmy Fallon嘅Show，“Late-night Talk Show”𠮶啲搬过嚟香港做？
陈：其实我觉得我哋好有空间去做，不过我自己嚟讲，嚟紧𠮶年未必有时间去处理，但譬如我做《志云拆局》，其实系好辛苦，因为录影就4至5个钟度，咁剪辑成40几分钟，剪辑都好辛苦。之前做嘅资料搜集真系一叠叠，要用好多时间去消化，同埋又要去揾嘉宾，揾咗嘉宾又要了解嘉宾，租借场地相当困难，因为个议题富争议性，好多场地唔愿意借出。
喜：因为净系“大麻应唔应该合法化”，大馆已经唔借，因为原本我个构思就系大家由监窗景里边去做讨论，我觉得喺呢个监窗里边，三条友喺度倾偈，个画面已经Picture tells story，亦都冇乜电视制作有做过，咁但系好遗憾，大馆听到“呀大麻？唔喇……”咁样，咁变咗好多时候又真系讲“同性恋是否值得拥有一个家”咁样，酒店唔借、靓靓餐厅唔借，点解唔借？因为呢个话题我唔钟意。
陈：有一间都颇大嘅连锁式嘅经营嘅快食餐厅，一听到“家、小朋友、同性恋”唔得喇，本来我都唔觉得社会有咁大歧视，但原来大家真系对好多议题都好避忌，我就觉得更加有意思去做。但我做完第一、二集嘅时候，我自己又好兴奋，我觉得同啲人，大家拗嘅时候，可以笃穿大家：其实你个立场个背后嘅理由，好多时我哋唔讲，我哋用好多一啲其他嘅理由去讲，点解我认为呢件事我应该咁嘅睇法，其实内里系另一个理由。譬如内里系宗教理由，咁你咪讲啰，冇问题㗎，你系因为宗教原因唔钟意，“我唔系，我唔系宗教原因”，然之后100个理由，但𠮶啲都唔系真嘅，笃到底就系宗教，其实真系冇问题，我可以唔同意你嘅宗教，咁我唔系唔接受你个说法。其实冇恶意，即系我哋想自己面对返自己，你们面对返你嘅理由，我面对返我嘅理由，咁我就知我自己应该点样去睇我个立场。
望大家剖析内里原因 面对真实的自己
“笃穿”最深刻嘅例子系咩？
S：譬如话讲到“同性恋系咪应该有一个家”，咁关启文教授佢负责嘅香港性文化协会，其实大部分都系一班基督徒嘅组织嚟嘅，提到“同性嘅伴侣领养孤儿，应唔应该支持？”佢嘅立场就好反对，因为喺咁嘅环境之下，小朋友成长会遇到好多困难，咁当然佢啲小朋友遇到困难系因为对呢一种嘅家庭有歧视，先令到佢遇到困难。但系笃穿个底，我就真系觉得主要因为宗教。我当时谂到一个例子，如果一个孤儿，佢冇人去照顾，佢自己孤零零成长好，亦或有一个家庭，纵使个家庭系一对同性伴侣嘅，系咪好啲呢？咁教授𠮶度都讲道理，佢都公道嘅，话“系呀，呢个问题真系冇研究过，应该政府部门嚟研究。”我觉得使乜研究，Isn't that common sense？唔系普通嘅常识已经话畀你听系咩，大家可能观点与绝对唔同，但系有趣。
不反对被问“性取向”：问题系我答唔答
关于同性恋的话题，一直备受争议，虽然有关同性婚姻平权的讨论不断，但似乎都裹足不前，有人争取同性平等的尊重，有人则要维护传统婚姻价值。而对于公众人物的性取向，大家更是抱有“猎奇”的心态，Stephen都是其中之一。
陈：我觉得咩问题都可以问嘅，不过问题系答唔答。我就好反对做访问时话“记者你冇问呢样冇问𠮶样”，咁多嘢唔可以问，做咩接受呢个访问。