【有片】曹永廉扎起十指照玩电话　田蕊妮不禁拍片高呼：出神入化

拍一套戏嘅时间相当长，由化妆换服到等埋位，睇晒剧本大部分艺人都系玩手机过日辰，但系如果好似曹永廉咁，剧情需要十只手指都包起晒，咁又点算好？你有张良计，阿廉自然有过墙梯，连田蕊妮同余思霆都忍唔住要录低放上网同大家share﹗

阿廉、阿田同余思霆正赶拍新剧《她·她·她的少女时代》，呢日继续开工，等埋位期间人手一机不停上网自娱。阿廉为剧情需要十只手指都用绷带包起晒，左右隔篱又挂住玩手机无人理点算好？阿廉先除鞋跷起脚，右脚脚指公玩WeChat揿掣录音，睇到阿田眼都定埋话：“包住十只手指都玩到电话，我深感佩服！”

古有周星星用脚食面开枪，今有阿廉用脚玩电话，但佢嘅特别技能又点止得一个﹗见到阿田同余思霆都被自己英姿吸引，阿廉又再使出绝技，用口玩电话﹗先将个咀点击萤幕，做出嘟咀，并用张开口嘅动作缩放照片，睇完一张仲可以钖住移动睇下一张相，令阿田笑到收唔到声，大赞阿廉简直系出神入化呀！