【人住公屋我住公屋】日本公屋租金逾万港元　中产人士都可以申请

ViuTv节目《人住公屋我住公屋》最新一集走访香港人热门旅游胜地--日本，并探讨当地嘅公屋（又称团地），日本嘅团地大概出现于二次大战结束后，由于当时人口急速增加，政府为改善低收入阶层嘅生活，于是大量兴建团地。之不过，节目嘉宾主持盘菜莹子喺做街头访问时，唔少市民都似乎十分抗拒住公屋，并指如果有得拣，都会以公寓大厦为先，原因除咗系一种希望之外，最重要系日本好多团地都已经老化，所以就算租金几平都好，都无人吼。
 

日本团地分为公营住宅同公团住宅两种，前者由地方政府管理，提供比收入较低人士，收者则由日本国土交通省辖下UR都市机构管理，主攻收入较高人士，并设有收入下限，即系收入少啲都未必可以住，而两者唯一共同点就系只租不卖。节目中，日本香港人妻Antonia话日本团地予人又残又旧感觉，但当佢同盘菜莹子参观过公团住宅后，即时改观晒。
 

R其实系Urban Renaissance(都市复兴)嘅缩写，UR都市机构管理由当只系为解决住宅问题而创立，但随时代变迁，依家已经变为负责住宅嘅管理维修以及团地再生，为咗吸引收入有番咁上上嘅租客，公团住宅试过同无印良品同宜家家居合作，负担设计部分。盘菜莹子参观嘅两间公团住宅，虽然距离新宿约40分钟车程，但其实对日本人嚟讲，真系好湿碎。最重要系佢参观嘅单位有近900呎，两房两厅，月租都只系8,200港元，同区仲要有幼稚园，真系方便到极点。而另一个700呎单位，三房一厅，月租约1万港元，有埋露台，又系无得输。