【早霸王】好心教路追女反被男听众指责　森美：个女仔都几阴功

上星期森美于《早霸王》接到男听众Carlos电话，由于Carlos对于表白成功都唔系太有把握，于是森美决定比多一星期时间佢，而且仲教埋佢点试探对方，都算唔话得。

Carlos心仪对象系朋友同事，由于朋友以“无拍拖”同“好索”做卖点，Carlos为求真相，于是就决定去呢个女仔打工嘅饼店睇睇。结果系点？佢话：“索呀！靓 ！仲要斯文。”森美听到之后，马上教路点先可以同对方变熟，例如系赞佢笑容亲切，但Carlos认为可以透过朋友得到女方电话，并透露之前已经同过对方出街。“𠮶次都几难忘，因为佢塞车遅咗一个钟，佢有WhatsApp我话会尽快嚟到。”Carlos话听到“尽快嚟到”之后，产生无限遐想，例如系呢个女仔可以同佢有更长远嘅发展，正当森美小仪都好费解点解Carlos会有咁嘅谂法时，佢就话：“我自high啫。”呢位男听众嘅风趣幽默真系不得了。Carlos指由于女方甩拖无耐，所以自己都唔系好有把握。森美于是提议：“你试下呢个星期问佢关于以前男友、爱情嘢，留意佢一举一动，讲下将来，睇佢有咩反应。”

一星期后，森美再次接通Carlos，佢真系有跟足森美指引去做，但当女方提到希望将来可以买楼、照顾父母、有多余钱去旅行时，Carlos就好唔识趣咁话：“唔使买层楼都可以做呢啲野。”不过，原来好戏在后头，Carlos话生日当日约咗女方去食饭，见对方无准备礼物，于是佢就话：“你锡我一啖，咁咪就系礼物啰。”森美听到呢度，都不禁叹气表示：“你真系不顾一切。”直指佢太过急进。Carlos之后再话：“佢有少少惊同唔肯，但最后都钖咗啖。”点解可以咁峰回路转？原来系Carlos同女方去到地铁站时，使出壁咚呢一招，兼且再一次表明：“唔准走，面珠墩都钖啖先啦。”Carlos话女方钖完佢之后，当晚收到对方短讯，内容大概系话Carlos令佢好尴尬，并同时向佢发出“好人卡”。“我之前用银纸折咗个心俾佢，佢𠮶晚摄返比我。我以为衰咗，但佢之后又有揾我倾闲计……”同Carlos倾咗两个星期电话，森美虽然大赞佢好笑，但就认为：“要接受佢呢种有趣，女仔都几阴功，做佢老婆或女友都要有一番智慧。”

森美系打比女方前，教Carlos使出“以退为进”，连台词都度埋比佢，点知电话接通女主角－－兆仪后，Carlos一句唔记得，随即乱噏一通，仲叫对方今个礼拜去饮茶，搞到兆仪都忍唔住问咗句：“咁你使咩打上嚟讲?”，Carlos于是转返入正题：“我谂住同你讲，唔知点解好钟意你，佢哋叫我退一步，但我唔想，做人系要进步，right？（佢哋）唔知系未傻?如果你都钟意我，商台全体上下都好开心。”呢个到底系未表白？相信连兆仪都分唔出，好直接咁问Carlos：“你系未喺度玩紧我？你介唔介意转头再打比我？我返紧工。”为免呢个表白机会泡汤，森美把握机会问兆仪，而Carlos亦再讲多次：“我问你有无少少冧我？”但兆仪继续逃避，仲话晏少少私下打比Carlos，到底呢个表白结果系点？相信都系无望。