陈华鑫子宫颈短瞓床至36周　顺产诞6磅几囡囡：生完面对另一问题

怀孕嘅十个月对妈妈来说，既幸福亦面对住一个个难关，生产过程危险重重，生完要2个钟喂一次奶无限轮回，但见到BB一日一日长大所有事都值得。喺台庆剧《是咁的，法官阁下》中饰演实习律师嘅前港姐陈华鑫（Gloria）呢日喺网上报喜，囡囡已经顺利出世啦﹗佢接受《香港01》访问时透露：“生产时好顺利，但生完之后就插尿喉足足个几星期。”

Gloria喺IG上载囡囡嘅相留言话：“我们家的小公主出黎过圣诞节﹗终于见到妳，好彩妳足磅。”点解妈妈咁担心呢，因为怀孕中后期医生已经话佢子宫颈短，需要瞓床休息直至生得，如果唔系会有早产危机：“我上星期生，31周时医生已经话我开咗一度（即产程开始十度就可以生BB），之前我由31周开始瞓床到去36周顺产生咗佢出嚟，成个孕期BB唔算好吸收，大部分重喺我身上，所以囡囡出世有6磅5安士，无问题好健康自己总算放心。”

顺产生完之后原来Gloria苦难仲未完结：“我由阵痛到生用左4个钟，算系好快，老公全程陪住同亲手剪脐带。但生完之后我去唔到小便，要插尿喉插左个几星期，到今日先拆喉。但系都未好似之前去得咁畅顺，要慢慢train up番。伤口又痛，尿喉又痛，BB又两个钟要食一次奶，谂返起都辛苦。”

顺产后要插尿喉咁耐实在唔太常见，Gloria都有分享自己经验：“因为31周BB个头已经好低好低，医生话已经开咗一度，可以随时生！咁佢就压住左我膀胱压左好耐，变咗生完又面对多一个问题啰。特别感谢番我个主诊杜坚能医生，由大肚时到生产果刻都好用心照顾住我。”依家拆咗尿喉Gloria都无得好好休息，因为坚持喂人奶要每两个钟埋身，不过见到囡囡食饱后嘅满足样，一切都值得啦。