【专访】张敬轩一打hashtag即变mean精：好睇过冠冕堂皇嘅说话！
有咩驱使张敬轩出唱片之余仲要拍网片？系爱定系责任呢？
“系穷呀！恭喜发财！”
访问时间有限，轩仔一句神回应划破大家绷紧的感觉，记者、工作人员，甚至他本人也忍俊不禁。
身兼歌手和社交平台达人，无论认真MV或是恶搞游记，统统赢尽“正皮”，歌曲《缺》MV更荣登“YouTube 香港 2018 年度十大热门广东歌”榜首。到底要在网络江湖中生存有甚么法则？岂料轩仔突然“跳tone”，一本正经地说：“如果大家想喺网络世界生存，你要知道hashtag系乜嘢！”
玩Hashtag平衡阴暗面 潜台词精彩过正文
张敬轩简直是“Hashtag之鬼”，每次发文总会加上一连串Hashtag，有时更会“Mean精”上身幽你一默。“Hashtag只不过系潜台词，可以打一啲心入面阴暗面。某程度上系一种精神分裂，你同我都会有。”最简单例子，即使心情不佳，但面对同事、上司你亦要表现友善，有多少不满也只能唱句《讲不出声》。“Hashtag好睇过啲冠冕堂皇嘅说话，同埋我觉得佢系免责嘅，真系㗎！因为同一个hashtag唔只系我用㗎嘛！”
轩仔亦点出网络世界一个值得玩味的地方──自定义，如何演绎由你话事。他记得最近一位演艺界前辈发文写上“#WTF”，大家也感错愕，但原意却是“Welcome To 乜乜乜”。正因为网络世界容许这种错摸，比传统媒体自由，让他能最大程度地忠于自己，放下公众人物的包袱。
人与人沟通太麻烦 开Live安抚寂寞的心
“有咩Whatsapp倾⋯⋯”这是今时今日大家的口头禅，公事、心事，甚至情话也透过通讯软件传达，明明渴望有人陪伴，却抗拒真人陪伴。“因为人同人之间嘅沟通太麻烦，好多嘢要顾及，网上嘅陪伴方便好多。”所以轩仔有时选择凌晨时分开直播，观察这个城市有多少人与自己一样寂寞，需要陪伴。“呢种陪伴系好深入，好精神上嘅交流。我可以最大程度讲一啲自己嘅谂法，关于生死、生活；甚至遇到唔好嘅处境，可以为自己澄清。”他续说：“你问我系咪完全冇宣传考虑呢？唔系嘅，如果系嘅我就素颜啦，系咪先！不过心态好紧要，喺争取关注嘅同时，唔好刻意去经营，要真心咁去做。”
MV留言板变“情人桥” 让网民表心迹“做功德”
网络不单让大家隔空陪伴，也是网民情绪的出口，“千字文”留言屡见不鲜，作为公众人物也要有智慧去应付。“如果你（网民）打完一堆我都唔知你闹紧我乜嘅Comment，你会好过啲嘅，咁都系我嘅功德嚟㗎㖞，亦都系呢个平台存在嘅价值。”除了批评，也有窝心的一面，《只是太爱你》的留言部份让轩仔最为感动：“《只是太爱你》MV下面嘅留言，好似系告解牌咁，网民将自己过去一段好遗憾嘅感情，或者要表白嘅说话写晒出嚟，好似情人桥锁上‘连心锁’一样，系精神层面意义，佢亦细水长流咁慢慢传播开去。”
你有冇喺《只是太爱你》留言呢？就算冇，睇完啲留言你就明轩仔点解咁感动。
“我唔会再唱《潜水》嘅Live，首歌唔系人唱㗎！”
轩仔今年音乐上非常多产，有四首派台歌：《缺》、《天才儿童1985》、《潜水》及《百年树木》，在电台播放均有好成绩。但论MV点击率，《潜水》在数字上相对最低，是否代表大众还未能接纳“非典型”广东歌的风格？轩仔说：“我觉得唔可以输打赢要，唔可以有一种自己系网民上帝嘅感觉，唔系你Post咩人哋都要受。”他续说：“虽然《潜水》view数系相当最低嘅一首，但系佢系我音乐上好新嘅尝试，因为我未试过咁嘅曲风。举个例，基因再好，再靓嘅夫妇，生十个小朋友，点都有一个个样冇咁靓啩？但佢可能系最有天赋，父母最锡都未定呢！”
正当我还在想：“所言甚是……”轩仔再次“跳tone”：“我今日喺到宣布，我唔会再唱《潜水》呢首歌嘅Live㗎喇！唉……每一次唱呢首歌都好似断送紧我嘅歌唱生涯咁！因为作曲𠮶个系冇谂过唱Live㗎！冇谂过唱𠮶个嘅感受，林家谦（作曲人）自己唱都系‘抆抆地’！”绝对有理由相信，那句“恭喜发财”，以及连串玩嘢Hashtag全都发自他真心，赢得网民关注的确有原因。
《缺》MV荣登“YouTube 香港 2018 年度十大热门广东歌”榜首