杨千嬅朱晨丽撑陈炜做视后 周柏豪甘做太监“Spring Pocket”
撰文： 洪晓璇
出版：更新：
万千星辉颁奖典礼将会喺12月16日晚上举行，今年最佳女主角被视为黄智雯、李佳芯及陈炜三人之争，战况相当激烈，当中又以黄智雯早前夺新加坡及马来西亚双料视后，被网友睇高一线。话晒陈炜喺《宫心计2深宫计》中太平公主一角都深得民心，呢日佢都出招拍片拉票啦﹗
炜哥早两日同剧集《多功能老婆》嘅拍档杨千嬅、周柏豪食饭聚旧，顺便为12月2号生日嘅朱晨丽庆祝生日。饮饱食醉唱完生日歌兼切蛋糕后，佢地一时兴起戏精上身，扮鬼扮马拍片帮太平公主拉票。千嬅饰演春娇，朱朱饰演春朱，柏豪都跟大队做“春字辈”，不过改咗做英文，叫Spring Pocket。
+3
片段一开始炜哥就太平公主上身坐喺度，千嬅入镜递上餐牌问太平公主︰“想食乜嘢？”但就被霸气反问︰“春娇我教咗你，行礼系咁行嘅咩？”朱朱飞身入镜又被闹︰“压死我啦春朱，你以为我系皇帝，你色诱我系咪呀！冇心情食嘢呀。”最后千嬅叫小鲜肉太监柏豪入嚟侍候：“叫啲人投你（陈炜）票啰，投《万千星辉》...”话口未完，千嬅朱朱就抢答︰“投最佳女主角。”最后几位笑到揽埋一齐，真系相当老友呀。