【救妻同学会】朱智贤演出有惊喜　蒙眼逃生劲刺激：最惊碌落山

无线周日剧集《救妻同学会》开播2集，虽然揾嚟胡鸿钧、刘佩玥等年轻演员，但由于剧集不停穿插两个时空，令唔少观众都睇到有啲乱。之不过，乱还乱，但仍有网民发现于剧中饰演Milan一角嘅朱智贤(Ashley)演出有惊喜。朱智贤于2013年落选港姐后，随即加入大台并凭《3日2夜》获封为新咪神，近年主攻主持嘅佢，拍剧机会寥寥可数，但喺第2集《救妻同学会》中，朱智贤一次过试晒飞车、绑架、闹交戏，唔少网民都赞佢有样有演技，并谓睇唔出佢拍剧经验唔多。

朱智贤接受电话访问时，坦言剧集播出前非常担心自己演技会惹来负评。“今次系第二次正式拍剧，戏份亦都比较重，都有压力，但好在大家都正评，呢样系无谂过，所以好surprise。自从《3日2夜》后，大家将我同性感拉埋一齐，即系朱智贤就系性感，性感就系朱智贤，就算近期已经无参与《3日2夜》，都似乎摆脱唔到呢个形象，所以剧集出街后，系真系好开心，因为网民唔再focus喺我身上，而系演技，好似打开咗演艺事业新一页咁。”一直恨拍剧嘅朱智贤笑言自己虽有不少进步空间，但仍希望不久将来会以不同的角色同观众见面。

提到剧中的绑架戏份，朱智贤指拍摄前因落大雨令山路变泥路，加上自己没有方向感，所以超担心“逃生”时会碌落山。“同埋现实我唔会畀人绑，所以一方面会恐惧，但另一方面都有少少刺激。”剧中朱智贤与姚莹莹呢位后亲母感情要好，但其中一幕讲述朱智贤发现爸爸带埋小三返屋企，令姚莹莹要入住朱智贤宿舍，二母女因而发生争执，作为新人，要同前辈吵大镬，紧张程度拍得住被绑架。“𠮶幕开剧无耐就拍，好多嘢都未上手，同埋又要培养情绪，所以好紧张，好在莹莹姐超nice，无架子无态度，拍之前陪我练习，埋位又再排几次先正式roll机，佢令到成件事都好好多。”