张栢芝传诞下第三胎后首次露面　带Quintus出游似唔似坐紧月？

早两日忽然传出张栢芝再做妈妈，秘密产下第三胎，震惊娱乐圈。不过由头到尾都无人影到栢芝大肚，佢身边好友亦纷纷表示唔知情，到底栢芝系咪刚生完BB坐紧月，真系一个谜。呢日终于有栢芝新相流出，大家又不如睇下觉得佢似唔似刚生完BB？

由于栢芝于8月份将IG所有相片全部删除，大家想知栢芝近况只能从佢嘅朋友们著手。近几日圈中同栢芝相熟嘅朋友们，都俾传媒疯狂追问生B呢件事，12月2号终于有人上载栢芝最新照片。饮食作家兼主持Bonnie上载同栢芝以及Quintus两张合照，留言话：“今日小朋友游乐日又撞到好姊妹Ceci，Quintus愈嚟愈高大靓仔呀﹗”

见到相片中栢芝著上红色中袖上衣，放低一头秀发戴上太阳眼镜，睇落精神相当唔错，依旧面尖尖，对住镜头摆出V字手势。Bonnie有打卡显示地点于深湾游艇会，二人手上都有紫红色手带，分别带同小朋友到场参加会员日活动。Bonnie接受访问时表示，无向栢芝求证系咪生咗第3胎，眼见佢手脚依旧纤幼行动自如，加上坐月应该唔会走出户外吹风，相信一切只属传闻并非事实。

其后Bonnie留言话：“各位传媒，post哩张相系得到当时人嘅同意，手上嘅紫色手带亦系最好嘅证明，张相系寻日(12月1日)AMC member’s day影嘅。其他嘅嘢都讲晒亦无嘢要补充，要问就问峻当时人啦，唔该晒。”