【解决师】王浩信连场打戏终告受伤　左手打石膏宣布手指骨折

最近正在热播嘅剧集《兄弟》打戏连场，男主角王浩信当然都系动作戏连场，打得有板有眼。拍摄中嘅新剧《解决师》中，王浩信继续要日打夜打，呢日忽然上载两张“露骨照”，原来佢打到手指骨折要打石膏﹗

剧集《解决师》7月初举行开镜仪式，但睇返王浩信IG，佢早喺半年前已经开始特训，仲揾嚟好朋友伍允龙监督，训练武打动作，应付戏中连场动作戏。呢日佢喺IG话：“为咗庆祝单野，就同大家分享一张入行以来最露骨嘅相，鼓励大家要keep住团火！”所谓嘅露骨唔系性感照，而系X光片一张﹗

原来连场打戏令王浩信左手受伤，X光片中明显见到骨折位置，佢仲要打石膏，睇见都觉得痛呀﹗“只手伤咗几日，再完成埋呢几日打戏，拍摄中嘅《解决师》戏入面嘅打戏终于告一段落，我都忍不住去睇医生，发现尾指骨折了，所以未能出席早前颁奖礼记招，抱歉。不过呢个post唔系要令大家担心，而系想同大家share下，经过呢件事，我发现原来我底𠮶浸当我面对自己钟意做嘅野，痛都可以唔理嘅质地无被岁月冲淡，就好似以前拗咗柴第二日就落场打波𠮶种热血，仲好似比以前严重咗。我真系觉得几开心，因为我感到活著！”