【救妻同学会】简淑儿海报剧照活动都唔见影　粉丝震怒留言闹爆

曾几何时香港都有唔少青春剧，《Y2K》、《四叶草》系列捧红唔少青春偶像，不过近年以年轻艺人挂帅嘅剧集已经买少见少。TVB周日时段新剧《救妻同学会》，被网友称为隐藏版台庆剧，一班30岁以下演员担岗演出，预告片亦拍出青春气息，令网友相当期待。不过有份参演嘅简淑儿，喺海报、剧照、甚至首次公开宣传活动都不见踪影，引起无限联想。

TVB新剧《救妻同学会》重启周日剧集时段，喺11月25号晚八时三十分首播，每集连播2小时。一班主要演员年龄都喺30岁以下，剧集自开拍起于网上重点宣传主攻年轻人市场。近年被受网友追捧嘅简淑儿（Jessica）都有份参演，拍摄时都有分享唔少花絮照，但嚟到剧集真系出街，海报、剧照、甚至首次公开宣传活动都不见其踪影，有传因为Jessica非TVB亲生女所致。

2012年参加香港小姐入行，及后成为组合少女标本成员之一，Jessica经理人合约属GME，同TVB只有部头合约关系，有传因为咁令《救妻同学会》宣传时都未见其踪影。唔少Jessica粉丝深感不满，于剧集官方IG洗版问偶像点解被冷待“又冇简淑儿? 小编成日话特别角色，我觉得系只系大客串”

官方IG亦有直接回复大家嘅疑问：“以小编嘅认知，客串人物只会系一个时空出现，客串亦无分大小，简淑儿同郭子豪都系特别角色，会一齐穿插系两个时空入面，但就唔系佢地十个长期居留嘅人，到时候剧集出街就会知道点解。故事蓝本亦唔系小编负责同控制，我每次见到简淑儿都会同大家分享去尽量满足你地嘅要求，希望大家可以以和谐并且用一个欣赏嘅态度去支持救妻同学会同简小姐，再一次感谢你对救妻同学会的支持！”原来Jessica只系客串，咁成件事好似合情合理噃，希望佢档期配合到都多啲一齐宣传，咁粉丝就最开心啦。