《女人四十》田蕊妮讲错英文　网友：To后面几时加ing呢？

男人四十一枝花，女人四十烂茶渣？由田蕊妮主持嘅全新节目《女人四十》，每集揾嚟唔同嘉宾，大谈40岁女人嘅唔同经历。其实对于现今女性嚟讲，无论你系20、30定系40，只要有自信就乜都得！

阿田喺节目中同观众探讨女士们热切关注嘅问题，当中更献上唔少镜头前嘅第一次。首集阿田分别面对一班10后同00后小朋友嘅挑战，不过对佢嚟讲都无难度，仲获得“27岁靓女”嘅认证，难怪阿田都话D自信即刻返晒嚟呀！

每个年龄都会有唔同嘅经历，讲到结婚生仔呢个话题，唔少女士都觉得30岁最啱timing，始终无人想做高龄产妇。阿田更到私人诊所检查子宫健康，献上绝密片段！

唔好以为40岁女人无market，阿田喺节目中大玩Speed dating，仲有10几个合适对象，一众男士使出浑身解数，当中不乏笋盘，好似科技公司创办人Jerry、电竞公司创办人Derek等等，但唔知系咪因为紧张得滞，阿田同Derek打招呼𠮶阵，就讲咗句“Nice to meeting you”……oops，“很高兴见到你”系“Nice to meet you”又或者“Nice meeting you”先啱呀。节目一出就掀起网友热烈讨论，甚至越讲越兴起，一个post升华到变咗做“To后面几时要加ing呢”，其实有D情况底下，To后面跟动词要加ing，最常见嘅例子就系look forward to（期待）：“I look forward to seeing you.”（我很期待与你见面。），仲有be addicted to（上瘾）：“I am addicted to watching soap operas on TV.”（我沉迷于看肥皂剧。）等等。大家以后识得点用啦！

其实阿田为了这个节目付出咗唔少：“由构思这节目到拍摄，当中遇到了不少困难与未知数，我也是一边拍一边体验，大部分时间都是要临场变通，过程中真的学习与体会了很多。”不过对于节目中穿插嘅英文句子，观众最紧要系睇清楚，唔好跟住学错咗呀。