【楼奴】Ansheles拍《迷失假期》非为钱　战斗民族要挑战香港楼市

香港楼价高企，想要安居乐业真系唔系话咁易。之不过，拥有战斗民族血统嘅Ansheles 来港读书并成为艺人之后，完全未有被呢个石屎森林吓怕，除高呼“我好爱呢个地方”外，更有意在港置业：“因为可以喺香港买楼，先真系成功。”

ViuTV剧集《迷失假期》以英国少女来港寻亲为背景，由她入住的蜗囊旅馆带出不同住客的故事。虽说剧集乃小品之作，但起用的演员，除了入行多年的骆振伟外，如“俄仔”Ansheles 、Asha Cuthbert 、陈振华等皆为“白纸”一张，颇为大胆，再加上剧集不时以画面、音乐、动作交代情节发展，香港观众或者需要少少时间才会看得明。于剧中饰演导游兼打杂嘅骆振伟就话：“拍摄时只系觉得节奏无其他剧讲得咁白，但作为演员我都几享受，因为你唔会永远都想用对白交代故事，今次学到好多嘢。”

机会可一不可再

身为新丁，Ansheles同Asha话收到剧集剧本时，便毫不犹豫答应演出，Ansheles解释系因为同编剧倾过之后，有感这个角色存有自己嘅影子，认为可以挑战一下，拍完之后，更认为自己可以在剧集有更多发展。

至于Asha接拍的原因仲简单，“之前Ｍodeling想食个包都冇份，今次机会实在太难得，想做到最好。”土生土长的英菲混血儿Asha，曾担任模特儿，两年前与同性伴侣移居英国，在当地做办公室助理，唯后来发生情变，在人生最黑暗的时候，她收到了《迷失假期》的剧本，如曙光一样把她带回了香港。“拍剧时自己仲有好多问题未解决，佢哋畀咗好多提议。去英国之前因为做Ｍodel开始赚到钱，搞到成日都谂接job是否应该要以钱为先，自己都未谂清想点行条路时，变得好乱、好负面亦都好灰。”

俄仔婆婆见孙仔住蜗居即喊

同样都系靠做model发围的Ansheles是否也有同感？“做嘢唔系为钱，而系因为我喜欢工作，我刚到香港时Complete Zero，冇朋友、冇工作真系乜都无，但而家揾到食之余甚至可以帮到屋企人，愈赚得多系代表我真系有努力，我遇到挑战唔会话放弃或者沮丧，而系谂如果克服到就好叻。”18岁来港读书，由一粒中文都唔识到今时今日可以用流利中文做访问，俄仔Ansheles又真系叻。提到剧中的蜗囊旅馆如㓥房一样，Ansheles话身在俄罗斯的婆婆曾因见到新闻中的㓥房而受惊，喊住咁打比佢。“佢睇到新闻，喊住打嚟问我系咪住喺咁嘅地方，仲叫我有困难唔怕讲，可以帮手。妈咪来香港时，见到我屋企有少少发毛、出面又有老鼠，觉得我好似好惨咁。”

俄仔买楼论：想试下自己有几叻

虽然深知喺香港连租楼都难，但Ansheles就逆线而行。“我系好想买楼，我成日都觉得如果喺香港能够一个人生活得到，去到边都可以，香港生活真系好难，但我想试下自己有几叻，所以想买楼，咁先真系成功！”他解释是因为小时候在俄罗斯成日都要搬屋，后来更到欧洲工作。直到来港后，他从“住耐啲”的念头萌起“买楼”的打算，骆振伟在旁听到Ansheles一直说“我好爱香港”，也忍不住指他是个真正的“战争民族”，因为自己就从未谂过做楼奴。

骆振伟中六合彩都不买楼：唔想冇自由

“我系好反对，成日都听到香港唔够地方住，但买楼／出租不停发生，为嘅就系赚钱，成个社会都系咁嘅时候，就睇下边个有楼喺手、唔使挨，而钱就变为最大Power，好多国家都只限市民拥有一个物业或以政策去限制租金，但香港系好鼓励人去买楼，导致楼价咁高，买楼系咪就过到人世呢?” 骆振伟更指就算中六合彩都唔会用作买楼，而他亦曾见过身边好友为了供楼而冇晒自由。“如果要牺牲咁多嘢先得到层楼，值得咩？”系唔值，但“买楼”似乎已成了香港人的心魔，唔少情侣都认为有楼先有幸福，不过Asha就唔系咁睇，“结婚有间屋，咁你婚姻系未就可以完美？唔保证架㖞。”对她来说，另一半愿意同甘共苦、一齐挨快餐才是更重要。

场地提供: Lazy Boss

骆振伟服装: SCOTCH & SODA

骆振伟Stylist: Lilian

Ansheles Makeup & Hairstyling: Becky Kwan