【妻子的浪漫旅行】 陈小春求婚爆喊片流出　应采儿爸爸：我愿意

求婚一世人一次，好多人唔明点解女士会有无限幻想，特别男士觉得拍拖时间耐咗，大家想结就结，何必做一场大龙凤呢？陈小春2009年向应采儿求婚成功，眨下眼已经结婚八年，佢地喺内地综艺节目《妻子的浪漫旅行》中，播出当年求婚片段，估唔到喊到收唔到声嘅居然系小春﹗

之前应采儿喺节目中已经爆料，话当年小春求婚时喊到收唔到声，不过口讲无凭，新一集就将当年求婚片段完整播出。片段一开始小春已经跪喺地下，身穿绿色背心嘅应采儿就企近门口掩咀而笑，既惊又喜，剧情发展落去梗系问句愿唔愿意然后礼成，点知小春净系一直跪：“er……我不知道该说什么。”

现场有份见证嘅应采儿爸爸爸妈妈，见到小春讲不出声真系笑个唔停，应爸见佢唔出声仲抢先话：“小春，我愿意嫁给你﹗”应妈都帮口：“再不讲我帮你讲啰﹗你到底答不答应。”正常人求婚系单膝下跪，而小春系一直双膝跪喺度，仲亲自揾嚟应采儿父母见证，呢份心意点可能唔感动。到最后终于讲出一句“嫁给我。”二人拥吻结成良缘，9年后重温陈生陈太依旧感动，应采儿仲话：“时隔多年，我比求婚当天哭的还要惨。”