《大时代》丁家四蟹RE-U　邵仲衡陶大宇郭政鸿吴启明同框掀回忆

经典是，无论几多年后睇返转头，都系历久不衰备受追捧。2015年TVB喺深宵时段重播神剧《大时代》，92年嘅作品一样引起追剧潮，连带几位剧中主要角色都翻HIT，当中饰演丁蟹囝囝嘅孝蟹邵仲衡乘势复出幕前，孖住另外2只“蟹仔”陶大宇、郭政鸿拍广告，仲齐齐担任阿爸郑少秋演唱会嘉宾﹗

不过丁旺蟹吴启明就早已转行，拒绝重返幕前，虽然四蟹工作上再合作有难度，但四蟹同框呢日就实现啦，邵仲衡率先上载合照，见到久未露面嘅吴启明戴上厨师帽著上围裙，台上有几杯红酒四位把酒共欢。原来呢晚饭局系郭政鸿安排吴启明请客，陶大宇话：“今晚好开心，四只蟹仔终于可以重聚一起吃饭。多谢启明请客，郭政鸿的安排……非常珍惜这一刻，实在难得、难得、好难得﹗”

郭政鸿就透露原来呢间餐厅系吴启明开设：“四蟹饭局四兄弟齐人梗系要食豪啲啦﹗多谢三蟹丁旺蟹请客，启明哥仲亲自落厨喺佢餐厅整嘢食，估唔到你嘅厨艺真系好正㖞﹗仲要撞到老友Bobby，想唔醉都几难，大家开心到爆裂﹗”睇返资料，吴启明嘅餐厅位于中环九如坊，集中法日三地烹调，单系一碗饭已经严选3款米混合而成，晚市套餐约150元一位属中价路线，颇受区内食客追捧。