【台风玉兔】首执导广告撞风王　张建声硬闯菲岛潜水

超强台风“玉兔”会喺未来两三日杀到，有报导指呢个劲过“山竹”嘅风王大致会先吹向菲律宾吕宋。张建声（Justin）原定将去菲律宾，拍摄首次做导演嘅品牌广告，却撞正“玉兔”来袭，但因为已筹备好整个拍摄计划，机票、酒店、工作人员全部俱备，Justin 经考虑后决定依照行程于呢两日出发。Justin 话：“因为所有嘢都凖备好晒，同埋个风都未知吹去边，我哋照去住先。今㳄拍广告仲要潜水，拍啲水底镜头，都有啲制作，所以除非菲律宾出预警先再考虑。”

Justin近日已分别考取open water 18米及advanced open water 40米潜水牌，咁啱有位热爱潜水嘅客户斟他拍广告，双方一拍即合并于菲律宾小岛取景，Justin 称：“我有个潜水教练朋友做呢次广告嘅导演，我都会帮手一齐做学吓嘢，自己首次执导系特别认真同紧张，要做好多准备功夫，每日瞓得四五个钟，同埋因为要出埠，好多嘢唔可以出错，挑战性非常高。”

之前学潜水时，Justin深感香港水质污染严重，令佢更了解保育嘅重要性：“试过中午十二点前，潜到十八米系伸手不见五指，能见度一米唔够，环境系咁恶劣。保育真系好紧要，将来有咩执海洋执垃圾活动都会尽量参与，自己好想出分力宣扬。其实学潜水好好玩同好有得著，因为你会发觉海底世界好平静，同埋考潜水牌要学控制呼吸、理论、计数，最紧要够冷静，对于我呢啲成日咁冲动嘅人嚟讲，对我做人、生活同演技都有新领悟。”