【全民造星】功臣花姐劲感动：彩排时喊咗次，头先都匿埋喊咗次

ViuTV选秀真人骚《全民造星》昨晚（14日）在九龙湾展贸中心举行总决赛，最后由赛前大热姜涛赢得冠军，而亚军和季军分别由Ian和Lokman获得。节目监制花姐（黄慧君）接受《香港01》访问时坦言非常满意参赛者的表现：“佢哋嘅水准已经唔系参赛者，如果而家带佢哋开演唱会都绰绰有余！（最有演唱会感觉系边个？）姜涛，佢彩排时我已经感觉到佢已经系星。”

至于整个骚有否进步空间，花姐就觉得有些参赛者好紧张：“龙志权手都震埋，佢彩排都震，可能系经验问题，但以几个月嘅参赛者嚟讲，今日嘅表现已经好好。（佢哋一齐唱《前传》好感动？）我彩排时喊咗一次，头先都匿埋喊咗次，谂返起一开始99个骑骑呢呢跳得唔齐，到今日台下Fans跟住唱，系我想像唔到嘅事，好感动。”她又指Stanley和Edan的表演令她有惊喜。

问会否觉得《全民造星》算是为香港电视界“做咗啲嘢”？花姐答谓：“我觉得系令观众知道香港系可以有自己嘅星，而最开心系有人话畀我听，人系应该有梦想，最成功系呢样嘢。（制作生涯代表作？）其实我好多节目都好好睇，哈哈！不过佢唔系我最钟意嘅节目，我最钟意系《脱独工程》同《胖伴》，呢个节目我都好钟意嘅，因为我好钟意班仔仔，因为佢哋教咗我好多嘢！”花姐坦言曾一度想离开电视圈专心陪家人，但一班《造星》仔仔令她反思自己，既然他们能够为理想向前冲，为何自己要放弃理想：“我应该趁行得走得继续做落去。”

提到日前ViuTV在发布会宣布《全民造星》有第二季，花姐笑称公司未经她同意便公布消息：“都一定会搞，可能下年会招募，如果真系想而家呢班仔仔行多步，我会专心帮咗佢哋先，跟住先谂第二季。（下季玩女？）玩女就唔会我做监制！”