【潘嘉德荣休】星光熠熠媲美台庆　杨怡马国明重遇令罗仲谦呷醋

下个月就系TVB台庆，每年都系全台艺人出动嘅日子，不过呢晚金牌监制潘嘉德举行70岁大寿暨荣休晚宴，出席嘉宾可能比台庆更星光熠熠。除咗《少年四大名捕》吴卓羲、陈键锋、林峰及马国明难得合体，仲有阿姐汪明荃、李克勤夫妇、梁汉文、车婉婉、周励淇、高海宁、陈智燊宋熙年、胡杏儿等。

因为拍摄潘嘉德监制嘅剧集《On call 36小时》，擦出爱火花嘅杨怡以及罗仲谦拍拖到贺，佢地话多得德哥呢个媒人先可以修成正果，当正佢系爸爸一样。最好笑系到夜晚9点几仲未散席，罗仲谦就上载一张扁晒嘴嘅相，老婆杨怡就挨埋《On call 36小时》中嘅老公“一件头”马国明膊头，谦仔留言话：“你们旁若无人，叫我情何以堪呢？”

至于同样已离巢嘅胡杏儿亦晒出大合照，同昔日战友吴卓羲、陈键锋、林峰、马国明、杨怡留影，当年花旦小生重聚令网友高呼回忆返晒嚟，杏儿自己都相当感概留言话：“难得的合照，我觉得还差叶璇，你们觉得呢？”被点名嘅叶璇好快贴自拍照回应话：“我正在地铁站通顶演持枪悍匪啊！我的心跟你们在一起”