【全民造星．专访】旁白文卓森想继续献声：有人叫我平价少爷占
ViuTV选秀真人骚《全民造星》将于明天（14日）举行总决赛，届时最后10强会在九龙湾展贸中心一较高下，虽然一直以来观众都倾向将焦点放在姜涛、Ian、肥仔等大热门，又或者晨早已被淘汰但极具潜质的Anson Lo身上，但这个节目都有一些男生值得留意及支持，当中包括为节目献声做旁白的“旁白君”文卓森。
文卓森并不是一个专业的旁白、配音员，他本身是《全民造星》的撰稿员，但节目经过他的声音润饰后，绝对是生色不少，其抵死、搞笑的旁白风格，令观众对节目的印象更为深刻。其实文卓森曾经在DBC数码电台做过DJ，大学时期已经在电台做Operator及新闻报道员，到大学三年级时，他胆粗粗地将节目Demo交给台长，而台长亦非常大胆地安排他逢星期一至五下午3点至5时主持节目，与郑裕玲主持的商台节目《口水多过浪花》对撼：“其实当时我仲喺城大读紧书，好彩有几个阿Sir都系喺电台度做，好明白我个情况，就算走位都唔怪我，有时仲会车我返工。”
曾在电台做DJ
DBC数码电台在2016年停播后，文卓森做过PR、做过Marketing，最后因为见到ViuTV请人，便加入电视台做撰稿员并成为了监制花姐下属，参与了《歌度有》系列、《胖伴》等节目制作后，今年便着手搞《全民造星》的工作：“喺DBC做咗4年都想试其他嘢，我试过做PR、Marketing，虽然都系涉及创意，但系同能够娱乐到人个感觉系好唔同。”
提到做电视台撰稿与做电台DJ的工作性质亦大为不同，文卓森坦言一早谂通：“其实喺电台做咗4、5年都好够皮，始终做电台做4、5年都系Fresh Grad价，求其揾份工都可能高人工过做电台，所以而家做嘢都系求开心多。（但都辛苦？）好似细个转学校咁，要适应，但系好快就适应到，呢度唔似电台，准备好晒先埋牙，出外景好多时有突发嘢，几得意、好有挑战性，但解决到系好有成功感。”
再次献声
至于讲到文卓森最后为何能够担任《全民造星》的旁白，感谢监制及创意总监赏识的他坦言除了自己有“电台底”外，客观因素都帮助他不少：“因为呢个节目比较赶，我哋系一路拍一路做后期，基本上我系一星期返足七日，咁冇理由叫个VO Talent返足七日等开工嘛！由于本身我都系写旁白，我录埋个效率就最高，咁当初都要试嘅，而《全民造星前传》就系我嘅考验，我录完花姐就觉得OK，叫我继续录埋之后嘅集数。我听到好开心，有种莫名兴奋，把声可以再次畀大家听到。（花姐平时点？）佢的确系有种令人望而生畏嘅感觉，但佢唔系不近人情，仲识讲笑添！佢亦都系一个善解人意，好温柔嘅女士，同埋从来都系对事不对人，唔会闹人。”
写稿时感动流泪
谈到文卓森在《全民造星》的前期，与在后期的旁白风格甚为不同，他坦言这个是一早安排：“点解一开始99强、55强会咁Mean，系因为一开始一班仔仔都系好Raw，预咗好多人会闹，所以我哋希望观众闹我哋，而唔系闹班参赛者。如果我哋闹咗佢哋先，观众笑完喇，就唔会话参赛者唔好，因为我哋都闹咗，观众都无谓再闹。”而去到之后团体战，“旁白君”的角色都会抽离一点，因为节目组想观众眼光聚焦于参赛者的成长、热血和泪水，“同埋已经冇位再去Mean佢哋。”他亦因参赛者的逐渐成长，感动得在写稿时喊了几次。
第100位《造星》仔仔
成长的，其实不止是99名参赛者，亦包括这位“第100个《造星》仔仔”文卓森：“其实我好多位都可以做得更好，但如果要做到最理想嘅效果，可能要用多三倍时间，不过比起一开始录VO，而家系上手咗好多，一开始我系用咗好多个钟去搞，但系如果你要我讲我整体有咩成长，我又唔系好讲得出。”文卓森坦言《全民造星》后亦想继续担任旁白：“畀多啲Job我吖！其实我真系好钟意做有关声音嘅工作，我之前做电台拍档系泰山，佢好鬼多电影预告片揾佢录VO，好正！唔系讲紧收入㖞，系佢好钟意《星球大战》，所有《星球大战》嘅戏都系揾佢录返VO，我自己就好钟意超级英雄电影，好希望可以有一日录到佢哋。”
平价少爷占
“有人话我把声似少爷占，我都好想好似佢咁做玩到声嘅VO，之前我帮手去录一个广告，系一条好正经嘅谓规则嘅短片嚟，录完之后Sound Engineer留低我，话叫我录多两个Demo，留低把声畀人拣下，话我似少爷占，可以做平价少爷占，佢推咗嘅Job可以畀你，录完之后，佢叫我录多个扮林海峰，话我可以做少年林海峰，佢唔做嘅嘢我可以做埋。（真系接到工作？）事实系冇成功过，畀咗两个朵我，但系都唔拣我，啲工作都系畀咗商台DJ，我永远都唔系首选，我觉得当时我系输名气，咁其实电视、电台嘅广告，系揾一把熟悉嘅声音，未必系揾一把好听嘅声。”其实他已经预备好上自己的舞台，你又预备好看他的表演未？
想睇文卓森点样玩自己把声？请点击以下片段：