【开心速递】阮政峰自豪出身儿童组：只要用心去演戏一定会睇到

无线处境剧《爱‧回家之开心速递》自开播以来一向收视都唔错，亦令当中不少角色成功入屋，连带演出的演员亦愈来愈多人认识，在剧中饰演池子孝的阮政峰就是其中一人。政峰自言从小已经好憎读书，但成为演员后背剧本却完全无问题，他说：“我可以一个英文字“when”背4个钟都背唔到点串，连我阿嫲都背到喇。而读剧本就可以背得好流畅，全程都好享受。”他于2011年第25期无线电视艺员训练班毕业后正式入行，最初加入儿童组主持《放学ICU》。

他对于自己出身于儿童组感到自豪：“儿童组系一个好好训练嘅地方，可以试好多嘢，有小剧场过戏瘾，又有好多好好嘅前辈帮咗我好多，我哋有句说话系“儿童组出品必属佳品”，所以我要做好自己唔可以失礼。”到了2012年政峰凭住剧集《心路GPS》中饰演张俊杰 (Sky) 一角而崭露头角。政峰坦言当时都会想“多啲人认识我就好喇！”随住角色的受欢迎，他亦心雄起来：“个人变得嚣喇，但自己唔觉嘅，净系好想攞多啲人嘅目光，想出位，想多啲人认识同埋讨论自己。好彩得一班前辈佢哋提醒我，我先及时醒觉。”

唔少人都话做艺人是挨出来的，政峰入行至今有好多演出机会，他自觉算是幸运的一个。不过，他也经历过事业低潮期，试过足足9个月无工开。他说：“大约系5年前嘅事，𠮶段日子好难挨，虽然算系一个过渡期，由儿童组转去剧组，但9个月真系好耐，当然会唔开心。因为之前明明仲有好多工作，变咗无工开，觉得好失落，靠底酬同埋储落的积蓄过活。咁我都有去学嘢增值自己，去学唱歌、修读演艺课程、练武术同魔术。”最后他终于等到了于剧集《张保仔》中演出一角，即使只有十场戏兼要剃光头都好感恩。

之后他就加入了《八时入席》剧组，原来一开始只得几场戏份：“当时套剧嘅演员已经埋晒班，试晒造型，系开厂前两、三日先有PA通知我话我有份，角色系道具同事，我心谂‘系咪又系啲行行企企，之后突然无咗我，唔要我嘅？系咪出完无耐又走𠮶只？’好唔想系咁样。我个角色要自己度造型，反而畀到好多空间我去发挥，我同拍档李霖恩又好有默契，拍完第二场戏之后，编剧就觉得可以再慢慢写落去，于是我嘅戏份就愈来愈多喇。”

然而，后来开拍的《开心速递》原本亦没有预他的，政峰说：“同《八时入席》系同一个监制，但今次就无我份，好失落。我主动去问监制，阴啲阴啲咁叫佢畀我入返去吖，话我想同周嘉洛、马贯东两个兄弟一齐开工。最后监制亲自打嚟叫我帮手话‘戏唔多㗎，无《八时》咁多’，但系我已经好开心，我深信只要用心去演戏，人哋一定会睇到。”政峰坦言曾经试过心雄变得嚣张，到要跌返落嚟再慢慢行，令他更加珍惜每个演出的机会，且时刻保持住一颗谦卑的心。