【有片】周励淇带队游电台　踩入直播室问森美点解唔约佢访问

做演员唔系话拍完套戏就完成工作，后续仲要配音补拍，同埋一大堆宣传工作。日前，周励淇（Niki）接受电台节目《一圈圈》同《星光背后》访问，为剧集《再创世纪》宣传。近年喺国内时间比较多嘅Niki原来已经有四年冇上电台，呢日佢仲特登拍咗条“电台一日游”嘅片。

片段一开始，Niki话作为一个歌手最常去嘅地方就系电台，不过其实冇歌派都可以去嘅。呢个时间原来撞正森美小仪就嚟做完节目，Niki即刻冲入直播室隔住玻璃同佢哋say hello，做完节目，森美好热情咁同Niki揽揽，Niki即刻打蛇随棍上：“你唔系同我做访问咩？虽然我无歌派。”森美就话：“上嚟要讲恋爱架㖞﹗”Niki笑言：“恋爱啰，我最钟意恋爱。”除咗喺直播室内外游走，Niki亦都带咗大家去歌手做访问嘅地方、仲同商台女员工玩到揽头揽颈。

冇去电台四年，Niki话今次勾起佢好多回忆，“谂番起以前做歌手时啲歌派台嘅心情，访问嘅画面一次过出晒嚟。以前上电台就系工作，好机械式；今次就唔同，虽然今次都系做宣传，但因为太耐冇去，心情系特别期待同埋唔觉得似系做嘢，好似去一个怀旧嘅地方去探朋友，讲吓自己近况。有种好温暖、好似返到自己屋企咁嘅感觉，人、环境都完全冇变，见番好多朋友、撞番好多DJ，好有归属感，好开心。”