【早霸王】女仔收兵男仔都有错　森美：唔值得可怜　

自从经历过“阿希事件”后，森美学精咗好多，就好似今集《早霸王》“你知道唔知道有人挂住你”环节，当佢听到女听众Ada想向同事表白后，即时问对方系咪女仔。证实完之后，Ada开始分享佢同女同事嘅一点一滴，二人除咗会一齐行山、游水、食饭之外，每次gathering之后，家住柴湾嘅Ada都唔怕路途遥远，同同事一齐搭巴士返屯门。不过讲到最sweet嘅，Ada就话月初去东欧旅行时，特意打viedo call畀女同事一齐睇日落。森美听完之后，都认为如果对方唔抗拒的话，呢单嘢应该都顺利，不过佢亦都补充︰“同同性食饭好正常。”而小仪亦都认为︰“女仔best friend好容易。”

Ada表示对方有同过男仔拍拖，但就未有探听过佢对同性恋的意向，Ada虽然认为唔会吓怕对方，但把声听落都有少少怯，“我都做得几明显㗎啦，同佢搭巴士佢一开始都惊讶，但都有keep住笑。”假如表白失败，会唔会连朋友都冇得做呢？森美即时爱情专家上身：“冇friend做我觉得唔惨，做唔到情人，你做乜要眷恋喺错误的关系之上？唔系件事有错，系对自己冇益。有啲男仔做兵，返到屋企暗自怜，呢个系自己攞嚟，做兵系唔值得可怜㗎，因为你自己选择，佢收兵你唔做咪得啰。”

分析完之后，电话接通同事Yan，例牌都要问声：“估唔估到边个打上嚟？”“有冇感觉到近排有人追你 ？”Yan就话身边好多朋友都对佢好，所以估唔到边个打电话要表白，再细问之下，Yan就话︰“Enjoy单身生活，同埋未ready、未遇到啱嘅人。”既然都已经讲到咁，森美决定将呢个爱的表白行动叫停。