余德丞今日出院 IG 发感谢文　Dickson：我只想身体健康

TVB 艺人余德丞(Dickson)上月8日踢波期间突然晕倒昏迷，被送往玛丽医院深切治疗部抢救，全城市民都非常担心他的安危，为他集气，幸好他昏迷近三日终于苏醒，留院近一个月，他今日终于康复出院了！

Dickson在IG 出Post，交代自己出院，并附上一张他自己跑步的照片，喻意自己已经康复及健康的可贵，另一张相则是一众TVB 同事给他的鼓励字句，还有一张他在月头生日，在医院中庆生的生日蛋糕。他留言感谢玛丽医院的医生护士们，还有一每日为他准备三餐的家人，以及同事、朋友及家人。

Dickson 的IG 留言全文：

“我出院啦 🎉 🎉 🎉

感谢玛丽医院既医生同护士们，见住你地早更完又夜更，又一大早巡房，又每日24小时留意住我既病情，真系辛苦你地！

感谢我既屋企人，每日担心我病情既变化，又惊我唔知有咩需要，仲要每日频频扑扑帮我准备三餐。

感谢我公司，我经理人同一班好同事，成日担心我会钻牛角尖乱咁念，一得闲就开解我。

感谢我既朋友，知我一个人闷，一有空档就嚟陪我倾计，仲要买埋生果糖水俾我食。

感谢每一位关心我既你地同支持我既 fans，系唔同既社交平台都见到有好多问候我既讯息。虽然我未能够一一回复，不过我绝对感受到你地既心意。

不过坦白讲，原来连续咁多日面对住一样既三面墙，加埋打唔开既窗，感觉真系好难受！所以我都希望今次之后，我既身体会生生性性，争一口气，唔好再令大家担心。

医生话短期之内唔可以做运动住，相信都会系我最唔习惯既。生命无 take 2 ，今次咁好彩有多一次机会，我一定会好好珍惜。俾啲时间，等我休养多一阵，好快我就会重新出发💪🏼 #我只想身体健康 #回家最好不过 #第二生命#comebackstronger #happybirthdaytome”