罗兰玩食鸡好精灵　扮龙婆把声吓队友：夜喇…返归啦…

现年83岁的罗兰演龙婆就够晒惊吓同经典，而她私底下却是一个非常之可爱的老人家，而且仲好精灵好聪明，就算同后生仔一齐玩都可以完全无代沟㗎。日前罗兰姐就同无线节目《后生仔倾吓偈》的大学生KOL周程宇 (Vitas)， 一齐于Big big channel入面的《后生仔兴趣班》第二堂打机玩食鸡。无错，你无睇错，系罗兰姐玩食鸡，仲玩得好开心添。

Vitas同罗兰姐以及另外两个队友组成一组玩食鸡，其中一个队友见到自己个队员叫“罗兰姐”，竟然惊喜到爆粗并问：“你系咪真系罗兰姐？”罗兰姐就答话：“系呀。”之后Vitas又叫罗兰姐用恐怖Tone吓下队友，罗兰姐即刻龙婆上身变晒声讲：“夜喇…返归啦…”，真系好玩得，好搞笑呀。罗兰姐全程都玩得好开心，好投入，仲好客气咁同Vitas讲：“好在有你带住我呀嘛。”好sweet呀！

食完鸡之后，Vitas就同罗兰姐玩完Switch，比赛斗食得多热狗。罗兰姐好乖咁跟足Vitas的指示去玩，擘大口做出食嘢的动作时，更配埋音不停咁“umm、umm、umm......”食得好快，非常之可爱，结果仲赢埋添，又话：“好饱呀。”唔少网友都话好想同罗兰姐一齐玩呀。下集预告就系罗兰姐玩VR，好潮㖞！

一齐睇下罗兰姐食鸡同食热狗时有几可爱啦。