泳坛女神刘湘亚运破世界纪录　颜值极高人气急升　

外貌出众不能否认可以占有一定优势，但同时亦令大家忽略其实力，娱乐圈如是，原来体坛都系一样。正在举行嘅印尼亚运会，21号晚香港女飞鱼欧铠淳出战50米背泳决赛，最终得到第6名，而中国泳手刘湘游出26秒98，刷新尘封近十年嘅世界纪录，睇到企喺颁奖台上嘅刘湘，原来外表仲相当出众，被内地封为真人版美人鱼﹗

呢次刷新世界纪录，刘湘成为首位突破27秒大关嘅女子背泳选手，1996年出世仲有十日先22岁，180CM高超长美腿，加上清纯甜美靓样仲有小酒窝，早已成为内地网友心目中嘅泳坛女神。不过第一美女、游泳女神，一切关于刘湘嘅封号，只限于颜值而唔系成绩。呢位“花瓶”以行动话俾大家知，自己嘅实力都值得受到关注。

刘湘嘅父母都系篮球运动员，从小佢就展现出过人体育天赋，众所周知国家队运动员自小就刻苦训练，佢亦都唔例外。不过刘湘始终系后生女，游泳场外其实都同一般少女一样，钟意出游钟意玩影相apps，不时大骚白滑长腿，仲自爆有煲近期hit爆嘅《延禧攻略》。贴地又亲民兼外型出众，唔知刘湘又会唔会好似港产女飞鱼欧铠淳咁，试下拍戏做演员呢？