【美女厨房】张敬轩洪卓立带法宝踩场　“攞你命三千2018”有乜？

《美女厨房》周二（7日）邀请到张敬轩及洪卓立做节目嘉宾，二人相当重视呢个节目，所以带咗一个法宝上嚟，名叫“攞你命三千2018”，轩仔介绍番呢个法宝有乜先：“银筷子用嚟验毒，变黑就唔好食，工业用口罩用嚟防异味，有食物夹，用来夹食物，不用皮肤去接触，亦都准备咗日本、德国仲有本地著名防肚疴嘅药物，仲带咗来自日本嘅幅射检测器，睇下啲食物有冇幅射，因为听讲今日食嘅食物系生化武器，同埋带咗喂食器，作用系乜呢？可以直达胃部，减少胃部损伤，最后如果大吉利是，就用呢一个铃召唤番嚟。”听完轩仔讲，觉得轩仔真系好夸张，不过轩仔表示如果大家有做足功课，完全唔夸张。

洪卓立本身都唔系话好惊，但竟然身边一众同事都替佢担心，点解呢？“因为我有好几次系内地都有不良纪录，系内地食完就肚疴，有几次差少少上唔到台，所以佢地同我出去做嘢食饭都会避开会容易肚疴嘅食物。”在旁嘅轩仔笑说：“佢就系传说中食物检查机，一食错嘢就会肚疴。”

问到二人身边边个朋友煮饭最叻？二人不约而同齐指厨神谢霆锋，轩仔话：“我哋公司当然系谢霆锋啦！（几时可以再食到佢煮嘅嘢？）呢个要等佢做完导师返嚟先可以。”而讲到煮饭最难食，洪卓立话一定系钟舒漫：“佢煮嘅食物好安全，但佢味觉好有问题，因为有次同佢马来西亚食‘捞起’，食嘅时候已经索到怪味，我食完一啖已经唔食，但佢话好好食，所以除非同佢出去食，佢煮嘅我会婉拒。”