王歌慧唔愿做亲生女　同大台倾足6个月：签经理人约好困身好辛苦

16岁已经被黎明睇中提携入行的王歌慧 (Emily) ，当年签约A music旗下以歌手身份出道，可惜只出了一首歌就被投闲置散。至前年签约无线重新出发，虽然并非大台亲生女但仍获得不少工作机会，做过音乐节目主持又拍过剧，角色戏份愈来愈多亦好抢镜。正当大家以为Emliy会在TVB有一番作为时，她却透露原来与TVB两年的合约已于6月时完约，并不会续约，决心要往外闯，仲话：“我想同ViuTV合作。”

到底是甚么原因令到Emily不再续约TVB？她说：“呢两年TVB一直都对我好好，畀咗好多机会我，我好多谢佢哋。我哋今年年头已经开始倾续约嘅事，佢哋畀咗好好嘅offer我叫我留底，要求我签TVB经理人合约，年期系5年以上，但系我钟意自由自在，亦都想同其他团队合作，例如ViuTV，想喺出面闯下。家人反对我走㗎，唔支持我离开，有劝过我话始终大台大公司会稳定好多，又话我失业，系无业游民。不过自己性格唔适合喺TVB工作，自己喺人际关系唔系好识得处理，喺度就要social多啲，公司大始终会复杂啲。我自己适合喺新啲嘅公司工作，无咁多制度。”

不少TVB艺人都希望可以被公司签做亲生仔女，即是签经理人合约，估不到呢个竟反而是Emily不续约的主要原因之一。她说：“我唔想咁困身，以前签A music系一个唔系咁好嘅experience，被绑死咁多年觉得好辛苦，又无嘢做，走又唔走得，真系有阴影，所以再签长约嘅话我会有啲怯，觉得好绑死喺一个地方，话就话公司会安排嘢畀我做，但都好睇自己嘅际遇，无嘢可以保证㗎嘛。对我嚟讲留喺TVB嘅赌博性更大，我想个主导权掌握喺自己手度。如果想喺TVB长做，决心要喺TVB发展系要签长约同经理人约嘅，签咗先会有更多嘅机会。但我喺出面发展唔理想，大不了唔做，我唔想零话事权，只有公司拣晒job畀自己做，我自己份人系比较有主见嘅。”

Emily直言如果现在不趁后生走，之后也不会走了，一心想出外见识的她要试过才心息。她说：“其实自己都钟意stable，但又想试新嘢，所以好矛盾同好争扎。我都唔细喇，今年28岁，趁依家要出去见识下，闯下，要试下。（去内地发展？）自己想留喺香港发展，听闻大陆更加要讲关系。我想同ViuTV合作，除咗拍剧，都想试下主持旅游饮食节目，会尝试自荐下，依家开始联络紧，睇下会唔会有合作机会。我觉得就算依家唔多人睇ViuTV，将来都会愈嚟愈多人睇嘅。”

Emily又话女仔到了某一个年龄就会谂结婚生B，她亦一样，如果要同TVB签多年长约，她亦未必有咁多时间可以commit得到，到时会想放多些时间在家庭上面：“呢方面都要plan下，签咗长约就无得话唔做㗎喇。”

场地提供：港威酒店Three On Canton