陈奕迅续约　自称宝丽金Fans连郑嘉颖唱片都唔放过

啱啱过完44岁生日的歌神陈奕迅喺今日〈3号〉举行记招宣布续约环球唱片。担任大会司仪的郑丹瑞〈旦哥〉就透露喺1995年曾为新秀歌唱大赛担任主持，记得当年系一位“略带脂肪”的小鲜肉夺冠，而23年后呢位“略带脂肪”的小鲜肉就成为超级巨星─陈奕迅。

喺呢个咁重要嘅日子，Eason都忍唔住有啲感触讲到：“多谢你哋咁多年入面都一直咁支持陈奕迅，我哋一齐经历咗好多…喜怒哀乐，你知我啲脾气又唔系特别好，虽然亦都可以好开心，亦都可以好唔高兴。虽然好多人觉得你都做咗咁多年啦，但其实我都好紧张，因为我好重视今日，同埋呢几年大个仔咗，囡囡又大咗，上有老下有嫩，屋企又有只领养返嚟嘅狗仔。好似越嚟越多责任 ，不过我抱住好积极，未来会有好多好开心嘅嘢。希望大家继续同我一齐过以后嘅日子，好多谢大家。”

当旦哥问到今次续约有咩新嘅优厚条件？Eason就话同公司合作咗14年，仲话自己一直对“宝丽金”呢个唱片公司好有情义结。Eason讲到：“𠮶阵我系签咗新艺宝〈曾为宝丽金唱片及新艺城电影（于1990年代初退出）的合资附属公司〉，新艺宝系我一直好渴望加入，我由细到大买得最多嘅唱片就系宝丽金，我系宝丽金fans，无论系校长、学友、黎明、周慧敏、关淑仪、草蜢呀，甚至郑嘉颖嘅碟我都有买〈咩叫甚至？咩意思〉千奇唔好误会，因为佢𠮶阵啱啱出嘅时候系棒球小子。甚至嘅意思系因为佢系一个新人，系未有人识，我唔理咁多，我会买。〈陈奕迅已经好欣赏郑嘉颖〉佢ok，佢明，所以无论咩宝丽金嘅出品我都会买。”

最后，Eason同环球唱片大中华区总裁裁暨执行长张松辉先生以及经理人甘菁菁喺大家见证下完成的签约仪式，为了祝贺Eason续约，张松辉先生将Eason历年来嘅唱片做成纯金唱片送俾Eason，象征佢多年努力，期待公司同Eason一直走下去。

同一日，Eason亦宣布自家音乐制作公司Eas Music将会签下郭伟亮成为旗下艺人。Eric Kwok亦喺台上笑言原因只有一个：“Eason想帮朋友。”但当被旦哥问到睇中Eric Kwok啲咩时，Eason就称：“Eric系我心目中Top5嘅香港男歌手之一，好欣赏佢嘅才华。”

Eric又同Eason同经理人甘菁菁喺大家见证下完成打手印仪式，张松辉先生亦送上金球拍俾Eric，象征大家一拍即合。但Eric就问张松辉先生有份签自己会否后悔，张松辉先生亦回应：“永不后悔！”