【Plan B．专访】吴嘉熙后悔曾令母亲受伤害：佢当时成日打我闹我

ViuTV剧集《Plan B》集荒诞与奇情于一身，情节走向更是出人意表，当中担任女主角的吴嘉熙（Cheronna）便在戏中策划了一场绑架案，而“肉参”竟然是Cheronna自己！原因只为向一个男人实行复仇大计，兵行险著，既大胆又黑暗。

Cheronna接受《香港01》访问时坦言这个充满阴暗面的角色难度极大：“佢将所有嘢都收埋晒，抑压晒所有情感，喺唔同情况会畀唔同嘅面貌你睇到，而𠮶面又唔系佢真正嘅一面。”问她会否觉得自己似角色般黑暗？她直指角色比她厉害得多：“我冇佢咁犀利，我试过憎一个人憎到想杀死佢，但我唔会实行，佢可以收埋个嬲样，但系我唔得，我觉得佢咁样已经好变态。”

从未实行报仇大计　但会衰冲动伤害人

曾经有文章便指出不少成功CEO都拥有心理变态者的性格特质，或许在这个社会中生存，变态才是致胜之道，但Cheronna从不觉得自己是一个变态的人：“因为我一嬲就有个嬲样，你会见到我唔出声，好容易畀人睇得出我有啲嘢。”她的确完全不符合做变态复仇者的必要条件，连第一关都过唔到：“我最黑暗都应该系得个‘谂’字，如果我男朋友（黄奕晨）背叛我，我最多都系话畀全世界听佢背叛我。（剪咗佢嘛！）都好㖞，但系一定好痛。”

或者以“冲动复仇者”来形容Cheronna会比较贴切，而这种性格亦的确令她身边不少人受伤，而首个被她报复的受害者竟然是其母亲：“我读幼稚园时，我曾经同我妈咪讲‘我死咗你就开心啦’，因为当时我系觉得妈咪成日闹我，好似好唔需要我，又成日打到我飞起想杀死我咁，所以如果我唔存在喺呢个世界上，佢会开心好多。当佢听到我咁讲后，佢就好伤心咁话‘如果你死咗我点会开心’，我就意识到我讲咗句唔应该讲嘅说话。”

同理心总有失手时　不够冷静赶走好心人

人愈大便愈明白到别人亦有难处，Cheronna在待人接物上亦改进了不少，但始终总会失守，总有冲动性格战胜同理心的时候：“我嘅队友都成日同我讲要冷静啲，其实呢个性格令我几蚀底，我谂真系有一啲帮助我嘅人，因为我嘅冲动令到双方喺工作上有冲突，搞到转咗帮第二个人。”但她坦言自己在Super Girls中却是比较少与人嘈交：“我哋会打千字文沟通，而我系负责睇！同埋有两个好叻闹交嘅人喺度，我唔会同佢哋讲道理。”至于两人的真正身份，Cheronna就笑住话要卖关子。

踏入片场感觉生疏　不敢称自己作演员

提到Cheronna在《Plan B》中是“万绿丛中一点红”，问陆骏光、王宗尧等演员会否充当哥哥特别照顾她？她坦言指自己从来不想令自己显得需要被照顾：“有时我好唔知点做个角色，觉得件事好Confusing，佢哋就会过嚟同我倾，教我点样处理呢个场口，叫我调整自己呼吸，等我可以进入到个状态。”她亦指自己感到如此压力最主要是因为她足足4年未有演戏：“我对上一次做戏已经系《女人俱乐部》，隔咗成4年，我系完全唔记得演戏嘅感觉，我发现一冇咗呢个感觉系好大镬，加埋呢个角色唔易做。呢个角色令我醒觉到一样嘢，就系就算我冇演出机会，我都唔可以丢低演戏。今次我系极度唔满意自己表现，因为我觉得自己需要付出好大努力先达到个情节，同时我觉得自己系演个角色，而唔系变成个角色，所以我唔敢讲自己系一个演员，第一冇乜经验，第二唔够专业。”为了克服困境，她不断报读相关课程，她亦好多谢男友肯为她在演技上排难解忧。