Coffee林芊妤陀仔瞓身教孕妇瑜珈　8月箩咁大个肚欧游度蜜月

到底艺人基因系咪异于常人？明明身边朋友大肚，个个都会“幸福肥”珠圆玉润，不过一众星妈个个手脚纤幼肥B唔肥人，特别系Coffe林芊妤，近7个月孕肚先得28吋腰﹗其实除咗先天优势，Coffee都好努力先keep到咁Fit，热爱瑜珈嘅佢婚后未有停低工作，日前更从早上8点开始教瑜珈，到晚上出席活动仍未有倦意，成为一众港妈偶像呀﹗

Coffee早两日出席活动，同20位大肚妈妈练习孕妇瑜珈。怀有“肚腩仔”嘅Coffee身形依然好Fit，做瑜珈亦是绰绰有余。佢向一众准妈妈透露，自己希望可以顺产，但因为胎盘位置低，要视乎之后“肚腩仔”嘅成长状况及胎盘位置会否回复正常，先可以决定使唔使剖腹生产。至于生完BB后会唔会停工做full time mum？Coffee就坦言：“要睇吓到时情况点样，不过我真系太钟意做嘢，应该会Keep住工作。”

8月份Coffee会同老公到欧洲自驾游当作渡蜜月，去匀法国、意大利、德国等地，算系佢地最后一次享受“肚腩仔”出世前嘅二人旅行；之后会开始减少工作量，静待BB出世。问到会否担心旅途太过奔波或者“肚腩仔”会赶住出世，Coffee表示：“今次会是自驾游，由老公揸车，我大部分时间坐喺度，应该问题不大，不过如果真系早咗出世就可能会做咗法国人喇，哈哈！”