【过街英雄】黄翠如原来曾同森美拍电影　大家记唔记得系边套？

TVB新剧《过街英雄》今日（25日）下午公布造型，森美同黄翠如今次饰演男女主角。唔知大家知唔知道其实翠如已经有相近一年冇喺TVB拍剧，咁佢呢段时间做咗啲乜？翠如指唔系专登一年唔拍剧：“咁之前都休息咗一段时间，差不多一年，其实今次开工都有少少压力，去咗学习唔同嘅事。”至于翠如呢一年学习咗乜？佢初初并唔想透露，但在旁嘅森美强迫翠如回答，翠如唯有无奈地回答：“我有跟老师去学做戏啦、去学咗做一啲运动、打鼓等等，仲有去咗一啲奇怪嘅旅行，就系平时你想唔到会去嘅地方。”听到呢到森美搞笑讲去咗地狱？翠如指并唔想太快去。

森美加翠如呢个组合，佢哋形容为大胆，因为其实二人拍剧数量并不多，翠如指自己喺TVB拍过嘅剧集十只手指数得哂，而森美喺TVB拍过嘅剧集更加少。但其实佢哋己经唔系第一次合作，翠如忆起当年拍摄第一部电影时候嘅事：“我第一套戏有演出嘅系《我要做model》，当时我只系一个老临，都叫做有对白，类似系讲阿边个到啦，但当我讲完镜头已经转走了。”森美听完坦白回应其实已经唔记得当时佢喺到。

讲番呢套剧森美系要SHOW肌肉，不过森美直言佢自己已经身材好好，唔洗特别去操Fit，咁同对手翠如会唔会都有啲感情戏有身体触碰？翠如笑言自己乜都唔知：“我哋剧中确实有感情戏，但仲未知道会系点写。”森美笑言畀定张相翠如番屋企对住做戏。