舒淇郑秀文聚会　梁洛施爆囝囝手指拗出唔拗入

梁洛施〈Isabella〉自从今个月宣布全面复出，不时都会喺IG同网友开心share日常生活。日前，Isabella就孖住郑秀文、舒淇、马诗慧同二女王丽嘉齐齐素颜去到经理人Kim屋企聚会。

梁洛施久休复出再战演艺圈：系时候返嚟我嘅演艺事业

几位大忙人难得聚埋一齐，都有各自post相兼留言话玩得好开心，Isabella仲分享咗同囝囝嘅小对话：“去食饭之前囝囝问我今晚我哋同边个食饭，我话去Auntie Kim屋企同几个姐姐食饭lol, 佢问我咁D〈啲〉姐姐系唔系好似你咁都系拍戏架（㗎）? 我话系呀。有一个叫Auntie Janet系Super Model嚟㗎。”讲完之后，Isabella就拎咗Sammi张相俾囝囝睇，仲问道：“妈咪型啲定Sammi姐姐型啲？”估唔到囝囝二话不说就话Sammi姐姐型啲。

呢个时候Isabella仲唔心息，再攞舒淇张相问：“舒淇姐姐靓啲定系妈咪靓啲？”囝囝继续食咗诚实豆沙包话：“Wow，舒淇姐姐靓啲！”完全估唔到囝囝手指拗出唔拗入嘅Isabella唯有同返囝囝讲，妈咪觉得你好乖同好诚实，你要keep住咁样知唔知道！最后，Isabella都忍唔住话：“真系俾佢激死！”