【BB来了】“金牌陪月”杨卓娜自称巴渣 刻意处理声线避免刺耳
TVB热播剧集《BB来了》因为剧情够晒贴地，获得唔少好评。杨卓娜饰演嘅“金牌陪月”更加因为手法纯熟，被网友大赞，甚至有网友留言话要揾个好似杨卓娜嘅女人做老婆添！
角色贴近真实性格 自称缺点多：只系大家睇唔到
卓娜接受电话访问表示感谢大家支持：“今次角色系一个好体贴和细心嘅女人，这方面其实和现实生活中嘅我比较相似，但其实我都好多缺点，只系大家睇唔到，再次多谢大家欣赏我。”对于自己在剧集中温柔的声线俘虏一众网友，卓娜就笑言在呢一方面的确下了唔少苦功：“其实我讲嘢平时好巴渣，识我嘅人就知只要我一兴奋，把声就好响，所以我要适当去处理我嘅声线，如果唔系好容易好刺耳。”
为配合角色淡妆上阵
平时除了拍剧同凑女，卓娜亦好注重皮肤保养，佢亦经常在自己嘅facebook分享日常保养心得。除了护肤，卓娜建议大家多做运动，多休息和饮食均衡。对于今次角色好多时都要淡妆上阵，保养得宜嘅卓娜反而觉得是一个大福利，佢笑言：“一个舒适嘅造型对角色都好有帮助，会比较自在。所以我自己都有花心思同造型师倾过点样嘅造型先可以畀观众一个温暖嘅感觉。”
暑假孖好姊妹去旅行
虽然最近剧接剧做到无停手，但卓娜透露会趁暑假会与圈中嘅好姊妹带埋小朋友去旅行：“其实我平来计划好暑期去旅行，但好唔好彩准备订机票和酒店嘅时候剧组已经Mark晒期，令我暑期得返一个星期嘅时间。但今次就会和陈爽和张韦怡去热带地方带小朋友一齐去玩。”
未计划再生B：我冇呢个勇气！
2009年，卓娜下嫁“广告灯箱大王”杨志翘后，除咗要照顾亲生女儿舒然之外，亦视如己出照顾两名继女。卓娜要兼顾事业和家庭，忙得不可开交，被问到有没有生B计划，卓娜都坦言没有勇气再生：“因为去照顾、培养和教导一个小朋友都需要好多心机。钱都系其次，陪伴嘅时间真系好紧要，因为唔想错过小朋友成长嘅每一个阶段。其实虽然我好忙，但我每一晚都要返屋企去睇佢，就算我唔系佢身边，我无帮佢盖被，但都会好焦急，好担心佢会冻亲。饮食上，我就反而唔太担心，每日食啲乜，工人姐姐太概都识煮。而且爸爸一定无妈妈咁细心，所以在这方面我会特别紧张。除咗读书、教养和陪伴，照顾小朋友日常生活都好重要。”