【扫毒2】陈家乐梦想成真与刘德华拍戏 ：发梦都见到佢！

人气急升嘅男神陈家乐今日联同卫诗雅出席运动品牌活动，二人今日现场更首次做DJ打碟，但表现如何呢？家乐回应：“其实本身以为好简单，因为自己节奏感都Ok，又有玩开结他，点知行到去揿掣，点都唔啱音，又甩哂beat，劲难听，好彩有另外一位DJ喺到帮我。”问番男神佢畀人有一种健康形象，佢平时会唔会都花好多时间去做运动？家乐回应：“自己好钟意踢波，以前工作唔太忙嘅时候，一星期都会踢几日，又可以同朋友聚会。”

自从人气急升后，大大小小嘅活动都会见到家乐嘅踪影，影视工作方面更成为抢手货。家乐多次活动上提到刘德华系佢偶像，早前《东方华尔街》虽然华仔有份投资，但冇份拍摄，家乐与华仔合作拍戏嘅梦想只差一步，而宜家家乐嘅梦想终于成真，因为最近佢都有份演出由华仔同古天乐主演嘅《扫毒2》，家乐都讲到拍摄并唔紧张：“拍摄期间好想快啲见到佢（刘德华），我番到屋企发梦都见到佢。”家乐讲到能够见到刘德华已经系佢嘅精神食粮。