【深宫计】黄心颖剧中演技大爆发　收过千留言：𠮶下我真系眼湿湿

最近黄心颖一直忙于拍摄《牛下女高音》呢一套新剧，所以佢缺席咗几次《宫心计2深宫计》宣传，不过今晚大结局，心颖当然盛装出席，并表示自己一直都好想出席所有宣传：“今晚同大家睇大结局，自己真系会好唔舍得，自己一直都有追，可能今晚情绪会比较失落，其实由一星期前已经开始唔舍得了。”

由黄心颖饰演嘅角色甘若芊深受大众喜爱，而角色喺剧中已死亡，网民纷纷大喊唔好，心颖当然有留意网民嘅留言，心颖透露：“有一晚我番屋企啦，预告讲到话我会出事，佢哋好紧张，差不多有一千个留言问我有冇事，𠮶一下我真系眼湿湿，终于努力番嚟嘅事情有人睇到，好开心。”马国明同黄心颖剧中生离死别都令到唔少人流下眼泪，更多人讲到心颖演技大爆发，有相当大嘅进步。心颖自己都睇咗好多次，佢直言自己都喊咗好多次，但问到系咪全因为对手系马国明先令到佢演技咁好呀？心颖自己都有谂过呢一个问题：“当然因为佢都系一个好对手，我哋之间都好入戏，个场戏喊到肿哂，令自己只眼都唔知去咗边，但我都会觉得系编剧佢哋写得好好，当然因为有佢（马国明）所以更加好啦。”

呢一套剧反应实在太好啦，喺网上点击率达到30亿时演员们更纷纷发放“福利”照放上网，心颖都唔例外，但问到今晚大结局之后点击率再高会唔会考虑一下发放同马国明嘅闪光弹？心颖回答：“生活照？可能今晚影一张啦，其实好多人都讲冇事嘅，剧中结局做唔成一对，现实好Sweet咪得啰，佢哋好想我Post sweet照，考虑考虑一下啦。”