【幸福三重奏】大S徐熙媛夫妇接拍真人骚　汪小菲宠妻似足偶像剧

大S徐熙媛2010年下嫁汪小菲，先后诞下一对仔女，虽然5月初宣告流产，但一家四口亦好快走出阴霾，生活渐渐回归正常轨道。6月27号系汪小菲37岁生日，大S除咗抢闸发微博送上生日祝福：“亲爱的老公，生日快乐！愿我们永远都是相亲相爱的死小孩！Love you！”最近两公婆仲首次一齐接拍真人骚，实行将甜蜜互动公开人前。

当年大S同汪小菲拍拖一个月就宣布闪婚，外界本是抱观望态度，呢7年嚟汪生汪太以行动证明，更成为圈中模范夫妻。呢次佢地参与内地真人骚《幸福三重奏》，预告中大S喺屋内抹窗，挑皮地向玻璃呵气，用手指画上爱心，身在花园嘅汪小菲走埋嚟，吻向窗上嘅爱心；仲有大S一边煮嘢食一边喂老公，食烛光晚餐都要不时对望拖手，网友不禁话：“好似睇紧偶像剧一样呀﹗”

育有一对仔女嘅大S同汪小菲，话已经4年半未单独旅行，呢次趁住参与真人骚，被制作单位安排两人到环境清幽嘅小屋一对一相处，24小时腻在一起，大S转发预告片并喺微博留言话：“难得24小时都跟老公相处在一起！回想起来忍不住想笑！”