杨丞琳吊盐水Po“四无素颜相”一样索　“一年没生病一病就不轻”

呢个世代，有图有片都唔叫有真相，手机APPS揿个制，去黑眼圈、磨皮、去痘乜都得，再懒啲一键完成，得咗﹗杨丞琳自16岁出道，观众睇住佢大个样真系无咩点变，最多系顺眼咗靓咗，增添唔少女人味。Rainie亦不时分享“素颜”照，对自己相当有信心咁噃﹗不过原来之前啲素颜相都系做过手脚㗎﹗呢日佢病住贴出两张真正“四无”素颜（无修图、无滤镜、无美肌、无上妆），到底会系惊吓定惊艳？

Rainie寻日忽然上载一张吊盐水嘅相，写上“再来打一次点滴，一定会好得更快。”原来佢已经病咗好几日，令粉丝相当担心，其后佢再po出两张“四无”自拍照报平安：“我很好，用两张超级”无修图””无滤镜””无美肌””无上妆”难得完全真实的照片 向你们报平安。不要担心我喔﹗一年没生病，果然一病就不轻，现在好了百分之八十五。”

好多女仔上载所谓嘅素颜相，无上BB CREAM画下眉，都会同APPS轻轻执走啲瑕疵，呢次Rainie“四无”素颜上阵，眉毛整齐皮肤滑溜毛孔幼细，只系有小小黑眼圈同眼袋，网友大赞好似学生一样咁清纯﹗不过有忠实粉丝发现Rainie嘴角上嘅痣唔见咗，本尊亦回应话之前已经点掉：“但它应该还是会长回来。”