龚慈恩女林恺铃学业为重唔拍拖　最欣赏男仔似黄子华

艺人龚慈恩女儿林恺铃（Ashley）今日盛装出席时尚活动。刚考完公开试嘅Ashley，表示无浪费假期，每日都过得好充实，“近排趁暑假好好装备自己，学吓演戏，仲有呢排都狂睇书，中英文书都有，偏向文学方面嘅书，英文方面我睇得最多嘅系Jane Austen，中文方面就睇张爱玲，哗，觉得好震撼。”

Ashley今年18岁，好多呢个年纪嘅女仔都开始睇张爱玲同Jane Austen，但估唔到依家呢个世代嘅妹妹仔都系睇张爱玲。Ashley话佢未拍过拖，难怪张爱玲的文字会令佢觉得震撼，问到会唔会都憧憬来一场校园puppy love，Ashley就话目前都系以学业为重：“我系一个day dreamer，份人好浪漫，但都想以学业为主，因为我知道自己好容易分心。”不过为人浪漫的Ashley，都话感情事听天命，“睇吓上天觉得几时就几时啦，（边啲男仔特别吸引妳?）聪明，（类似黄子华𠮶种?）哗，佢真系特别聪明，系另一个层次嘅人，真系非常欣赏佢。”