终极型佬苗侨伟正式“登六”　夕阳下咀老婆男人味完美释放

以前成日话年轻就是本钱，不过近几年大家好似愈来愈识欣赏成熟美，Keep得好嘅女士会称之为“美魔女”，Keep得好嘅男士除咗系型佬之外，种种人生经历亦令男人味日益浓厚。6月18号系三哥苗侨伟正式“登六”嘅日子，一对仔女苗俊苗彤，以及大班好友齐齐为三哥庆祝。

虽然三哥点睇都唔似60岁，不过话晒都系生日，唔摆大寿啫，家人好友都一定要同佢大肆庆祝一番。早喺12号三哥已经留言话：“假期启动”，同曾志伟、吴启华等好友，连日来打高尔夫球兼食好嘢。三哥囝囝苗俊一早就喺社交网站，上载三哥同三嫂戚美珍，于夕阳下嘅咀咀靓相，仲写上“60”字样。

而囡囡苗彤亦为型爸生日会忙个不停，有块木牌指示大家：“Welcome to Micheal’s Birthday”，仲有个靓靓立体草地生日蛋糕，上面插住哥尔夫球杆，果然好知爸爸心意呀。另一张相仲见到三嫂向三哥献上Birthday Kiss，一对仔女企喺两边拍晒手，相信今年生日三哥一定相当难忘。