【非分熟女】新戏变身宅男媾蔡卓妍 林德信：“现实我都系咁！”
撰文： 翁汉珑
出版：更新：
今日（13号）系Sa同吴慷仁担正嘅电影《非分熟女》正式开镜，有份参与演出嘅林德信(Alex)亦都有份出席，今次佢要饰演一位性格害羞内敛嘅电脑工程师，到底难唔难到佢？Alex就咁答：“我觉得并唔系难在角色，因为主要都系讲个男仔用啲老土方法去追Sa，其实我现实生活都一样好被动，所以呢个角色对我嚟讲唔算难。”
但原来今次拍戏难度唔喺戏内，反而喺戏外，Alex就话：“因为今次导演兼任埋编剧，好多嘢都有晒定稿，有时我觉得可以改进嘅地方，导演未必会认同我，所以个难度在于点样俾到个大家都满意嘅效果出嚟，好在导演脾气都好好，唔会因为意见不和嘈交。”
佢咁讲，系咪暗示自己脾气差，好易同人嘈交呢？Alex好坦诚咁话：“我最近都留意到自己开始有少少脾气，可能因为我至今都拍过几部电影，对于揣摩角色有番少少经验，自然好希望可以分享下自己嘅谂法，但若果有人未试过就Ban，点都会有少少唔甘心。”
但无论Alex自爆几多缺点，作为一位男神又点可能一直单身呢，一讲起感情生活，Alex即刻露出甜美笑容：“我谂有啲嘢......都系唔讲会好啲。”咁到底系咪表示自己有拖拍？Alex面对追问只系耸耸肩讲咗句:“Maybe.”轻轻带过，事实系点就惟有等大家自行判断啦。