吴彦祖遇无妄之灾　三藩市街头被砸车偷窃：早多5秒返就捉到佢

防人之心不可无，广告都有话，出门时要锁好门窗提防小手，不过有时光天化日之下罪案一样会发生，呢次受害嘅就系吴彦祖。最近Daniel人在美国三藩市拍摄美剧《荒原》（Into the Badlands），点知呢日喺街头遇上小偷，打烂佢嘅车窗直接偷走车内物件，令佢相当愤怒。

Daniel呢日上载两段短片到IG，片中见到佢嘅黑色座驾泊喺路边，有一架绿色私家车驶至，小偷落车左顾右盼后，打烂Daniel车窗取走车内两个袋然后离开。Daniel留言话：“我将车泊喺街头，就系片段最左边红色车前面𠮶架黑色私家车。可以见到有个男人企喺我嘅车尾，几秒后打烂车尾车窗，从车内取出两个袋。其实右边就系我同我朋友（片中黑衫及黄衫）行紧返去攞车，如果早多5秒返到，我一定会抓到佢。”Daniel仲呼吁大家，如果喺三藩市见到呢架绿色车，记得影张相通知佢。