余香凝乐与妹妹余洁滢合唱 最爱系TWINS：细个我扮阿Sa佢扮Gil
撰文： 邝钰莹
出版：更新：
余香凝21岁饼印胞妹余洁滢（Zoe）以《美女厨房》学徒身份正式加入娱乐圈，身为家姐嘅余香凝当然力撑，今日佢就孖住细妹Zoe一齐自弹自唱新歌《黑暗之外》，并将片段放上IG，虽然妹妹只系在旁做和音，但唔少网民睇完之后都表示两姐妹十分合拍，亦有人提议可以一齐唱LIVE，推到新歌之余，亦可以sell埋妹妹几有才，余香凝真高招。
余香凝接受访问时透露两姐妹小时候已经常合唱。“大家好钟意TWINS嘅时候，通常我扮阿SA佢扮阿Gil，学佢哋啲动作跳晒舞，我记得小学时，如果阿妹跟住我唱的话，我就会好霸道咁觉得唔可以，然而转歌，但佢都会照跟住唱，但依家就无呢个问题，因为觉得有佢和音好好玩，同埋同佢把声都好似，好有默契，出来成件事好夹，我都希望会作到一首送比妈妈或者系讲姐妹情。”对于有网民指两姐妹声线十分相似，余香凝就表示无所谓，更笑言最紧要唔好认错样。“试过有朋友走去同妹妹打招呼，佢个样好错愕，后尾朋友讲返以为我无礼貌。”