雷庄𠒇准备离港发展　港姐宣传片都冇份拍改由刘颖旋顶上？

2017年度《香港小姐》冠军雷庄𠒇（Juliette），昨日出席《2018香港小姐竞选》公开招募行动，Juliette呼吁各位要鼓气勇气嚟参赛，佢分享经验话比赛并唔系重点，因为佢自己之前参选时，认识咗一班好姐妹，喺自己人生当中占有一席之位，所以都希望大家除咗比赛之余，亦能认识一班亲如手足嘅好姐妹。

其实Juliette当选后负评不断，早前更讲到喺香港浪费一年时间，准备回去加拿大发展。而未知道是否因为Juliette呢个举动，所以有指刘颖旋（Tiffany）顶替佢嘅位置拍摄《2018香港小姐》宣传片。Juliette：“呢个系公司安排，都唔会讲唔开心，我都想..都希望有工作，都想参与个宣传片上，可能𠮶刻我系加拿大或者schedule唔方便，有好多原因我自己都唔知，its life有时系unfair，自己professional最重要。”Juliette都表示公司因为咁样安排所以令到自己冇太过忙碌，又可以专心做运动。TVB为Juliette安排嘅工作量，其实远低于早一两届嘅师姐冯盈盈及麦明诗，Juliette自嘲回应话：“其实拍剧都会有机会，不过可能自己中文要更进步多一点，或者仲有其他原因。”

至于另一个问题就系，决赛当日传统上会由上一届港姐冠军，为新一届冠军戴上后冠嘉冕，但而家TVB俾Juliette嘅工作已经少之又少，未知道决赛当日会唔会连后冠都唔使佢帮手戴呢？ Juliette听到之后谂咗一阵，语气好唔确定咁话：“I think so，I hope so，我都唔知道，公司都有好多唔同嘅决定。”