【深宫计】陈炜毒打袁洁仪20年 究竟太平公主系咪天生残暴？
撰文： 关颖贤
出版：更新：
《深宫计》播出第7集终于开始入戏肉，剧情讲到太平公主(陈炜饰)无论如何都要阻止太子妃(胡定欣饰)重建回心院，原因系太平公主将司膳房女史吴翠莹(袁洁仪饰)囚禁喺回心院，并将佢用铁链锁住毒打20年，挖去其双眼，再喺额头上划上“舌”字，仲用翠莹家人嘅生死去威胁佢几辛苦都要保住条命，如果唔系男嘅就凌迟处死，女就削成人彘，最后更迫到吴翠莹吐血身亡。究竟点解要费尽心思去折磨一个女史？全部都关系要为爱报仇。
话说当年太平公主嘅先驸马兄长薛𫖮涉嫌谋反，吴翠莹因为如实报导见到先驸马同薛𫖮有书信来往，所以武则天为咗斩草除根而将先驸马一齐问斩，所以太平公主就认为吴翠莹口舌招尤间接害到先驸马被问斩，而呢件事就证明到太平公主极为心狠手辣、残忍冷酷。
据历史记载，太平公主都唔系一生出嚟就咁心狠手辣，身为武则天最宠爱嘅细女，自细集万千宠爱于一身。当年武则天同李治因为唔畀太平公主嫁去吐蕃，不惜要佢入住道观，成年后就下嫁李治外甥薛绍，就算知道母后觉得薛绍配唔上自己，但公主仍然维护爱夫。太平公主原本只系一个天真无邪、不问世事嘅女子，直到薛绍被指有份谋反被问斩后，痛失所爱嘅太平公主就开始觉得变得心狠手辣。同时因为遗传到武则天嘅政治才华，加上当武则天死咗之后，太平公主想好似母后一样成为皇帝君临天下，而眷恋权位。为阻李隆基登上皇位，太平公主施诡计陷害对方，亲戚都冇情讲！
到李隆基登上皇位后，起初权力都落于太上皇李旦手中，而李旦咩都听晒太平公主话。控制到李旦之后，太平公主就更加放肆，指使宫女喺李隆基膳食中落毒，由于李隆基对太平公主处处提防，最后都落唔到手。落毒失败后，太平公主豁出去发动兵变迫李隆基退位，但遭儿子薛崇简劝阻，太平公主完全不念骨肉之情，连自己个仔都唔放过，打到血流披面，可想而知太平公主为咗夺权有几咁毒辣。