【有片】木村拓哉15岁细女光希首曝光　出道做女模叫Kōki

星二代由出生一刻已经受注目，虽然星爸星妈未必想仔女染指呢个五光十色嘅圈子，但如果星二代真系想进入娱乐圈，顶住父母光环可以话系事半功倍。木村拓哉及工藤静香婚后育有两个囡囡，一向严格保护，唔想畀佢哋嘅身份曝光，估唔到细女光希居然以模特儿身份，登上时尚杂志 ── 日本版《ELLE》最新一期封面，眉宇间同木村简直饼印一样！相关短片同照片一出，立即喺twitter疯传，有网民惊叹：“眼神轮廓都同爸爸似到十足！”

木村光希今年15岁，已经有170CM高，去年工藤静香于IG分享一张光希嘅背影照，身穿背心短裤嘅光希露出逆天长腿，手脚纤幼留住一头短发，虽然见唔到样但足以令网民暴动，工藤静香亦随即删除照片。

虽然一直有唔少经理人公司打两位千金主意，但木村同工藤纷纷拒绝邀约，亦有当地杂志报道，指木村明白艺能界嘅辛酸，原本唔太赞成个光希出道，但光希今年已就读高中，所以做爸爸嘅只好尊重个女想出道嘅决定。

呢次光希以模特儿身份入行，实在令大家相当惊讶。据报道指，光希女细细个就好钟意睇《光之美少女》，又钟意AKB48，会跟住佢哋首《Heavy Rotation》又唱又跳，难怪有传闻指，“AKB之父”秋元康好想木村两个女入佢啲女团，但工藤就唔想个女咁样入行，于是先会拣做Model。

木村光希登上《ELLE JAPAN》7月号，成为封面人物，杂志以“注目新星”介绍佢，虽然系第一次拍摄，但举手投足相当专业，眼神轮廓似足木村拓哉。呢本杂志极少以本土艺人作封面人物，可见佢地对光希真系相当重视。虽然顶住星二代光环，但光希似乎唔想靠父母，以“Kōki”为艺名，杂志内容亦未有提到父母嘅名，只系讲到光希依家除咗学习行CATWALK，仲学紧英文、法文及西班牙文，睇嚟有意进军国际。

呢辑相揾嚟日本殿堂级摄影师操上和美掌镜，制作花絮中睇到光希于拍摄现场相当专业，自动摆出唔同Pose，摄人目光令人惊艳。相片一出引起网友热议，唔少人惊叹遗传嘅重要性，指光希“修长身型似足妈妈，轮廓眼神同爸爸似到十足”，更笑言“简直好似木村著上女装，饼印一样呀。”